A tradición da gaita non se perde en Pontevedra

A Escola de Gaitas da provincia de Pontevedra iniciou o novo curso 2023/2024 cuns 200 alumnos matriculados, que xa asisten a clases nas súas instalacións no Instituto Feiral de Vigo (Ifevi).

Tal como informou a organización, as modalidades de gaita, pandeireta e zanfona volveron a ser as máis solicitadas, con 103, 21 e 16 alumnos, respectivamente. Entre outros datos, máis da metade do alumnado é muller, con idades comprendidas entre os 6 e os 72 anos.

Segundo reivindican nunha comunicación, na actualidade a Fundación Banda de Gaitas da provincia de Pontevedra é a "única" que traballa exclusivamente na formación da música galega e que ofrece a posibilidade de comezar a estudar a tradición de Galicia pondo a disposición dos alumnos os instrumentos necesarios durante os dous primeiros anos.

Así mesmo, a Fundación "continúa facendo un gran esforzo para que a matrícula nas modalidades de gaita, pandeireta e tambor, así como as clases, sexan gratuítas ata os 16 anos de idade", co obxectivo de atraer a novas xeracións.

A escola tamén ofrece outras propostas como canto tradicional, corda pulsada, acordeón ou música e movemento, todas elas sen límite de idade, polo que lembran que a matrícula segue aberta.