Picasso chega a Pontevedra a través do cómic español contemporáneo

O Café Moderno Afundación de Pontevedra acollerá, ata o próximo 13 de xaneiro, a exposición 'Picasso protagonista. Viñetas no cómic español contemporáneo', unha mirada orixinal á figura e obra deste artista no ano no que se conmemora o cincuenta aniversario do seu falecemento.

A mostra está comisariada polo especialista en cómic Asier Mensuro e está composta por máis de 170 pezas de 40 recoñecidos autores españois e galegos, como Paco Roca, Eneko, Ángel de la Calle, Javier Olivares, María Herreros, Tony Fernández Pons, Laura Pérez Vernetti, Idígoras e Pachi, ademais de David Rubín, Jacobo Serrano, Cynthia Alonso e Óscar Raña, entre outros.

Trátase de creacións de moi diversos soportes, algunhas delas concibidas expresamente para esta exposición, desde as clásicas historietas en papel, pasando por cómics en lenzo, obras en gran formato, cómics despregados no espazo, instalacións específicas ou xogos de mesa experimentais. Esta exposición xa conta con máis de 800 escolares anotados para asistir e participar na completa programación didáctica deseñada pola área Educativa de Afundación con actividades para todas as etapas escolares.

O percorrido expositivo estrutúrase en varios apartados que mostran unha lectura do artista a través de distintos enfoques: "El mito de Picasso", "Picasso y otros artistas", "La guerra civil española y Guernica", "Grafismos y lenguajes", "Iconos picassianos y herencias gráficas" e "Otra visión sobre Picasso". A mostra tamén inclúe a actividade "Tú, protagonista", un sistema de intelixencia artificial que pode transformar, en tempo real, a imaxe dos visitantes nunha obra de arte dixital, adaptada á etapa elixida da obra de Picasso: rosa, cubista ou clasicista.

Pontevedra acolle unha exposición sobre Picasso a través do cómic español contemporánea | Fonte: AFUNDACIÓN