Por Galicia Confidencial | Compostela | 28/09/2023 | Actualizada ás 11:58
Galiza Nova, a organización xuvenil do BNG volve manifestar o seu descontento ante unha nova visita do Rei Juan Carlos I en Galicia. E faino cunha campaña de cartaces nas que amosa o seu rexeitamento ao monarca español tras a cuarta visita que realiza dende que marchou do Estado español a Arabia tras a apertura de procesos xudiciais na súa contra.
"Iniciamos unha acción para que as rúas de Sanxenxo deixen claro que Galiza non ten rei na mañá do día que ten previsto saír navegar", apuntan nun comunicado. “É unha vergoña que as visitas do rei emérito xa sexan algo completamente normalizado” denuncia Marta Gómez, Secretaria Xeral de Galiza Nova, “dende a primeira visita no 2022 houbo unha total impunidade por parte dos gobernos tanto estatal como galego e, aínda que non sorprende, si que é un motivo máis de rexeitamento” sinalou.
A organización xuvenil denuncia que “a monarquía é a maior demostración do españolismo que ataca á nosa nación” e, tal e como explica Gómez “non ten cabida no noso país, non vai pasar sen resposta en ningunha das ocasións ata que Juan Carlos I sexa xulgado polos seus delitos”.
A secretaria xeral da organización denuncia tamén que “a monarquía española é a maior representación da dependencia da nosa nación do Estado español e como demostración este fin de semana estará representada no foro “La Toja” que deturpa os topónimos na nosa lingua”. A organización xuvenil do BNG anuncia que seguirán denunciando as visitas do rei emérito sempre que se sigan repetindo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.