Detidas tres persoas que cometeron alo menos tres roubos con violencia en casas da área de Vigo

A Policía Nacional detivo en Vigo a tres persoas, dous homes e unha muller, como presuntos autores de varios roubos con violencia cometidos na área da cidade olívica. Os arrestos ocorreron o pasado 12 de outubro, cando os axentes foron alertados de que tres persoas acababan de cometer un roubo con violencia nun domicilio da urbe. En concreto, accederían ao interior do devandito domicilio e solicitarían diñeiro aos seus moradores. Estes conseguiron zafarse e observaron como os ladróns fuxiron do lugar nun coche.

Minutos despois, unha patrulla intercepta un vehículo que saíra a gran velocidade dunha rúa estreita, saltándose todos os sinais de circulación e realizando manobras "arriscadas" para fuxir do lugar, segundo recolle a Policía nun comunicado. Por iso, procedeuse á detención dos seu tres ocupantes, cuxas características coincidían "plenamente" cos datos achegados polas vítimas, ademais de atoparse entre as súas pertenzas efectos provintes dos roubos.

Na mesma tarde, en dependencias policiais recibiuse unha chamada na que se informaba da comisión doutro roubo nun domicilio de Redondela, onde tres ladróns foron sorprendidos polos donos da casa e fuxiron no mesmo coche. Tamén a Policía Local tiña coñecemento dun terceiro roubo na mesma zona, onde se observou a tres persoas saíndo no mesmo coche da vivenda.

Unha vez en dependencias policiais realízanse as xestións oportunas para o total esclarecemento dos feitos, podendo comprobar que entre os efectos intervidos aos detidos, figura ademais un teléfono móbil, denunciado días antes, provinte dun roubo con violencia cometido en vía pública.

Coche patrulla da Policía Nacional nas inmediacións da Comisaría de Vigo | Fonte: POLICÍA NACIONAL - Arquivo