O director da CRTVG presenta no Parlamento os orzamentos para 2024 entre críticas de manipulación desde a oposición

O director xeral da CRTVG, Alfonso Sánchez Izquierdo, compareceu este xoves ante a Comisión 3º Orzamentos do Parlamento de Galicia para dar conta do orzamento da corporación para 2024, cun importe de 131 millóns de euros e "comprometido coa modernización, a transformación dixital e a tecnoloxía".

Segundo detallou, en comparación ao exercicio actual, reflíctese un incremento de 4,5 millóns de euros, vinculado ao incremento salarial do sector público previsto na lei, á consolidación do emprego, así como ao investimento en innovación, nomeadamente na nuevaplataforma dixital de distribución de contidos.

Izquierdo destacou que a CRTVG pechou as contas dos pasados 14 exercicios en superávit, "o que permitiu sanear a débeda herdada en 2009 de 51 millóns de euros e cunha temporalidade no emprego do 40%". "14 anos despois a CRTVG liquidou a débeda bancaria na súa totalidade, e reduciu o resto de débeda en preto do 80%", sinalou. En canto á estabilidade do emprego, pasou dun 40% de temporalidade a un proceso de consolidación en marcha do 100% do persoal, segundo o director xeral.

O orzamento da Corporación sostense principalmente, comentou, coas achegas da comunidade autónoma (123 millóns de euros) e con ingresos publicitarios, que para 2024 prevense en 7,3 millóns. A dotación orzamentaria no que respecta aos traballadores ascende a 57,4 millóns de euros, 1,3 millóns máis que no exercicio anterior, recollendo deste xeito o incremento salarial previsto no campo público.

NOVA PLATAFORMA DIXITAL E AUDIENCIA

Outro dos puntos destacados por Izquierdo foi o lanzamento da OTT, a nova plataforma dixital da corporación (prevista nun principio para 2019). Con ela, explicou, a CRTVG disporá dunha oferta de contidos en liña similar ao das actuais plataformas dixitais internacionais.

Deste xeito, o orzamento 2024 contempla unha dotación para a adquisición de contidos destinados a nutrir a oferta asociada ao lanzamento desta plataforma, "un incremento de orzamento que en boa medida redundará na industria audiovisual galega".


O PSDEG LAMENTA O INCUMPRIMENTO DE LEIS AUDIOVISUAIS

Precisamente a interpretación da audiencia foi un dos puntos de fricción co PSdeG. A parlamentaria socialista Noelia Otero pediu ao director xeral contextualizar os datos de Kantar Media en relación aos resultados do resto de televisións analizadas, que superan, en casos como Antena 3, por tres puntos a CRTVG.

Ademais, lamentou o incumprimento da nova lei do audiovisual, a eliminación das desconexións locais e o incumprimento da lei Xabarín, entre outras.

A isto engadiu o clima laboral que se respira actualmente na corporación, "que xa non é unha denuncia da oposición política", dado que, destacou, xa se pronunciaron o Colexio de Xornalistas ou as Federacións Europea e Internacional de Xornalistas, así como as sentenzas "que falan de persecución e vulneración de dereitos fundamentais dos traballadores".


"PROVOCACIÓN" PARA O BNG QUE A CRTVG FALE DE CLIMA LABORAL

Pola súa banda, a deputada nacionalista Alexandra Fernández cualificou de "provocación" que a corporación inclúa na memoria que o orzamento servirá para cumprir a lei de medios, "cando a incumpren sistematicamente".

Nesta liña, acusou á corporación de non cumprir coa súa misión de servizo público, pero onde máis incidiu foi na situación laboral da CRTVG, "con denuncias por manipulación e vulneración dos dereitos dos traballadores".


O PPDEG REIVINDICA A "BOA" XESTIÓN DO ENTE

Por último, a deputada do grupo popular Carmen Pomar felicitou ao director xeral polos datos de audiencia e puxo en valor que "se cumpra a lei e preséntense as contas da CRTVG, vinculada á Xunta de Galicia".

Sobre isto, e en comparación, remarcou que a comisión permanente de RTVE non está aínda constituída, o que para ela é un exemplo máis de "a renuncia de Sánchez á dignidade política á conta da dignidade dos españois".

Pomar concluíu reivindicando a xestión da CRTVG, "cuns orzamentos que permiten ofrecer un servizo público de comunicación audiovisual competitivo, de calidade e de interese para toda a cidadanía". "Unha corporación útil e de servizo para a cidadanía galega, pero tamén ben xestionada", insistiu.

O director xeral da CRTVG, Alfonso Sánchez Izquierdo | Fonte: Europa Press.