Galicia cóase no Benidorm Fest 2024, pero cunha canción en castelán
A pontevedresa Yoly Saa é unha dos 16 aspirantes elixidos
Por Europa Press / Redacción | SANTIAGO DE COMPOSTELA | 12/11/2023 | Actualizada ás 14:00
RTVE deu a coñecer este sábado, 11 de novembro, os 16 aspirantes que se presentarán ao Benidorm Fest 2024, a preselección que se celebrará na cidade alacantina entre o 31 de xaneiro e o 2 de febreiro do próximo ano para elixir ao representante español do Festival de Eurovisión.
Ademais, entre os anunciados atópanse os cantantes en solitario Almácor, Angy Fernández, Dellacruz, Jorge González, María Peláe, Noan, Quique Niza, Roger Padrós, Sofía Coll, st. Pedro e Yoly Saa. Tamén se seleccionaron grupos como Lérica, Mantra, Marlena, Miss Caffeina e Nebulossa.
Os nomes dos aspirantes para a terceira edición do certame anunciáronse nunha gala no Teatro Alameda de Sevilla no marco dos Latin Grammy que se desenvolven na capital andaluza este ano.
A directora de Comunicación e Participación de RTVE, María Eizaguirre, presentou a cita, na que tamén se informou de que as cancións candidatas daranse a coñecer o próximo 14 de decembro.
Así mesmo, sinalouse que o Benidorm Fest arrincará o 31 de xaneiro coa primeira semifinal, para continuar o 1 de febreiro coa segunda semifinal e, por último, o 3 de febreiro coa gran final na que se decidirá quen representará a España en Eurovisión 2024, en Malmö (Suecia).
As entradas para a primeira semifinal poderanse adquirir a partir o próximo 4 de decembro, mentres as da segunda sairán á venda o día 11 do mesmo mes e as da gran final o día 18. Todas elas poderanse comprar a través dunha nova tenda oficial que o Benidorm Fest porá en marcha.
