Dous fabricantes de camións condenados a indemnizar con case 4.000 euros a unha empresa de Narón

O Xulgado do Mercantil número 1 da Coruña condenou a dous fabricantes de camións a indemnizar con case 4.000 euros, máis intereses, a unha empresa de Narón polo sobreprezo destes vehículos de transporte, uns feitos acontecidos hai 16 anos.

O avogado da empresa de transporte, o ferrolán Juan Franco, en colaboración coa asociación europea de consumidores Dereito e Compromiso, exerceu a defensa da mercantil da comarca de Ferrol nun caso do denominado 'Cártel dos camións'. Segundo asegurou, o seu representado adquiriu en 2007 dous camións de macas distintas, unha de orixe alemá e outra italiana que, segundo a o fallo, foron sobrepreciados.

A sentenza baséase nunha resolución da Unión Europea (UE) do 19 de xullo de 2016, que considera que "a infracción consistiu en acordos relativos á fixación de prezos, a subida dos custos dos camións no Espazo Económico Europeo e o calendario e a repercusión dos custos de introdución de tecnoloxías de emisións para camións medios e pesados, esixida polas normas EURO 3 a EURO 6". Segundo a directiva "a infracción abarcou a totalidade do Espazo Económico Europeo, manténdose desde o 17 de xaneiro de 1997 ao 18 de xaneiro de 2011".

No caso desta sentenza, entende que "o acordo sobre fixación de prezos brutos repercutiu no comprador final, incrementando o prezo de adquisición do camión", derivado do acordo entre os principais fabricantes europeos de camións para pactar prezos que recibiu unha sanción da Unión Europea.