O conselleiro do mar acusa ao TC de estar manipulado polo Goberno e o PSdeG pide a súa dimisión

A lei do litoral de Galicia non deixa de dar que falar. A última polémica xestouse a raíz dunha recente entrevista do conselleiro do Mar, Alfonso Villares, na que aseguraba que "o Tribunal Constitucional vai dicir o que lle diga o Goberno", en relación co recurso que foi presentado polo Goberno central sobre esta lei, ao considerar que invade competencias da administración estatal e que pode ser perxudicial para moitos usuarios e empresas. O deputado do PSdeG Pablo Arangüena pediu manifestamente a súa dimisión tras estas declaracións, pois considera que "un conselleiro non pode dicir iso sen dimitir".

A vicepresidenta segunda e responsable de Medio Ambiente, Territorio e Vivenda, Ángeles Vázquez, e o conselleiro do Mar, Alfonso Villares, nun encontro con representantes de concellos costeiros para abordar o recurso á lei do litoral | Fonte: XUNTA - Arquivo

Como avogado de profesión, explica na súa conta de Twitter que "un conselleiro pode criticar sentenzas, razoadamente (ademais de acatalas), pero ten que respectar aos órganos xudiciais e moito máis a un órgano como o Tribunal Constitucional, que nin sequera forma parte do poder xudicial, porque é cúspide da arquitectura política e independente do resto de poderes". "Outra cousa é que se poida criticar que esa independencia estea comprometida pola politización das institucións e polo 'lawfare' (do que é campeón o PP), pero iso non permite restar validez ás sentenzas do TC e moito menos descalificalas preventivamente como está facendo o conselleiro", argumenta o socialista.

Ademais, considera que "esa descalificación preventiva do TC erosiona a credibilidade da democracia dende as propias institucións democráticas (como é o Goberno de Galicia) e resulta tan insólita, frívola e irresponsable que pide a berros a dimisión de quen a fai sendo nada menos que conselleiro". Así as cousas, neste contexto, Arangüena cre que "o propio conselleiro debería pensar que a súa afirmación implica non respectar as regras do xogo democráticas (das que é parte o TC), e se non é capaz de evitar pensar (e sobre todo de manifestar) o que dixo, non debería exercer como conselleiro dun goberno autonómico democrático". 

"A súa reflexión non é espontánea, senón froito da frustación do PP de Galicia ante as sentenzas desfavorables do TC en 12 de 14 procesos desde 2009, convertendo á Xunta nunha máquina de perder pleitos constitucionais, tamén o último recurso contra o importo do patrimonio", asevera o avogado e político. Finalmente, asegura que "claro que pode argumentar a favor da lei, pero non debería dicir cousas como 'mólame moito lela, é para enmarcar', especialmente porque como veterinario non creo que teña coñecementos constitucionais para dicir esas cousas". 

É INSÓLITO E LAMENTABLE que un Conselleiro da Xunta afirme en @lavozdegalicia que “o Tribunal Constitucional vai dicir o que lle diga o Goberno” en relación co recurso contra a lei do litoral de Galicia. Un conselleiro non pode dicir iso sen DIMITIR. Abro fío explicativo.🧵👇🏻 pic.twitter.com/H5xFE3Oun8

— Pablo Arangüena (@PabloAranguena) November 26, 2023