Galicia xa conta cun simulador endovascular para practicar a intervención do ictus agudo
O conselleiro de Sanidade participou no acto de presentación de resultados do Centro de Simulación Clínica (CESIS).
Por Europa Press / Redacción | SANTIAGO DE COMPOSTELA | 27/11/2023 | Actualizada ás 15:58
A Xunta investiu máis de 350.000 euros en adquirir un simulador endovascular que permite a práctica da intervención do ictus agudo nun tempo máis curto. O conselleiro participou este luns no acto de presentación de resultados do Centro de Simulación Clínica (CESIS), ao que se une este simulador. No acto tamén estiveron o reitor da USC, Antonio López Díaz; a xerente da área sanitaria, Eloína Núñez; a coordinadora científica do CESIS; Luz Couce Prieto; o xefe do servizo de Neuroloxía, José María Prieto González; e o decano da Facultade de Medicina, Julián Álvarez Escudeiro.
Comesaña explicou que o simulador inclúe diversos módulos específicos de práctica adicional, entre os que destacou os de cirurxía e radioloxía neurovascular (intervención cerebral e carotídea) e de cirurxía e radioloxía vascular en zonas periféricas (intervención de arteria femoral superficial). "Todo isto redunda na alta capacitación dos profesionais e na optimización da formación a distancia que se imparte neste centro", sinalou. Así, o persoal galego pode formar ao estranxeiro e expertos internacionais poden colaborar tamén na formación dos profesionais da comunidade.
O responsable autonómico de Sanidade reivindicou a simulación como "ferramenta moi importante na formación de profesionais", xa que permite "levar a cabo unha práctica dentro dunha contorna controlada e segura". Comesaña expresou o seu desexo de que nun futuro este tipo de prácticas poidan ser unha parte obrigatoria da formación dos futuros médicos. Aínda que nos centros do Sergas e nas aulas da Axencia Galega de Coñecemento en Saúde, xa existía equipamento e espazos adicados á simulación médica, reivindicou a necesidade do traballo "colaborativo e en rede" que "permita compartir os recursos dispoñibles e que facilite dita especialización".
Isto traduciuse, detallou, na creación, no mes de xaneiro, da Rede de centros de simulación clínica do Sistema Público de Saúde de Galicia. Nesta liña de colaboración, indicou que se incorporaron dentro do Plan de formación do persoal do Sergas, actividades nas distintas aulas de simulación médica avanzada, dirixidas fundamentalmente á formación do persoal en situacións de urxencias e emerxencias.
TRABALLO CONXUNTO COA FACULTADE DE MEDICINA
A este mesmo respecto, Comesaña, insistiu en que a posta en marcha do CESIS xa é en si mesmo unha innovación "moi importante", tanto na docencia pregrado como na formación continuada. "Este centro xurdiu das sinerxías da área sanitaria de Santiago e a Facultade de Medicina da USC", relatou.
Ademais, tal e como sinalou, o sistema que emprega o CESIS permite a interrelación en tempo real, a través da rede con outros hospitais ou centros de formación, conectando a contorna de simulación a nivel local e global. "Este centro posibilita simular situacións críticas en condicións de seguridade e en tempo real con outros centros a través dun sistema multimedia", explicou.
Neste centro, dispoñen de catro áreas: unha medico-cirúrxica, unha de simulación perinatal, unha sala de axiomenor e habilidades técnicas e outra sala de debriefing. Nelas dispoñen de simuladores de distintos tipos de pacientes, incluído o máis avanzado do mercado, así como varios de bebés e recentemente nados, tamén de prematuros. Por último, o decano puxo o foco na importancia de financiar este tipo de proxectos e en conseguir profesores e instrutores acreditados en simulación, así como en conseguir ampliar as prazas para estudantes.
