Aparecen dous novos casos de gaivotas afectadas por gripe aviaria en Ares e Xove

A Consellería do Medio Rural comunicou ao Ministerio de Agricultura, Pesca e Alimentación, a través da Rede de Alerta Sanitaria Veterinaria, a detección de dous exemplares de aves silvestres afectados por influencia aviaria nos concellos de Ares e Xove, confirmados polo Laboratorio Central de Veterinaria de Algete. Trátase de exemplares de gaivota patiamarilla, unha atopada con sintomatología clínica e a outra morta.

Trasladadas ao Centro de Recuperación de Fauna Silvestre da Vicepresidencia Segunda e Consellería de Medio Ambiente, Territorio e Vivenda de Oleiros e O Veral, as aves foron examinadas para proceder á análise laboratorial, eliminándose posteriormente os cadáveres conforme á normativa vixente.

Con estes dous novos, son 12 en total os focos notificados na nosa comunidade neste ano 2023, correspondendo 11 a gaivotas e un a un exemplar de 'palleira parasita'.

A notificación destes focos, ao afectar exclusivamente a aves silvestres, destaca a Xunta, non implica cambios no status sanitario de Galicia en relación á influencia aviaria, nin supón ningunha restrición ou medida adicional ao comercio de aves vivas e produtos derivados orixinarios da comunidade autónoma.

O Goberno galego sinalou que a día de hoxe a valoración de risco na comunidade é "favorable" ao non arrincar aínda o tempo de maior afluencia de aves migratorias silvestres, posibles portadoras do virus.

Deste xeito, hoxe mantéñense en Galicia certas medidas de prevención sanitaria unicamente no sete concellos da provincia de Pontevedra que pertencen á Zona de Especial Risco (Cambados, O Grove, A Illa de Arousa, Meaño, Ribadumia, Sanxenxo e Vilanova de Arousa).

A Xunta lembra que o virus circulante non ten capacidade "significativa" de infección a persoas, pero recomenda "non manipular aves atopadas enfermas ou mortas e notificar o feito aos servizos veterinarios oficiais".

Gaivota patiamarela nun tellado | Fonte: medioambiente.gijon.es