Os hostaleiros composteláns "satisfeitos" con que as inspeccións se cingan á prevención de incendios

A alcaldesa de Santiago, Goretti Sanmartín, mantivo este mércores unha reunión con representantes da hostalaría local para tratar diversos asuntos, entre eles a instrución de inspección que nas últimas semanas xerou críticas no sector e en relación ao que, segundo declararon ante os medios ao termo do encontro, achegaron posturas.

Lucía Vázquez, da Asociación de bares, pubs e discotecas, asegurou que o sector se sente "satisfeito" coa reunión, na que a alcaldesa e o seu equipo comprometéronse "a acoutar esas inspeccións de seguridade unicamente" a aspectos de seguridade contra os incendios. No encontro, entre outros, participaron tamén os edís Iago Lestegás e Míriam Louzao e o responsable de hostalaria.gal, Lois Lopes.

"A hostalaría é a primeira que quere traballar en seguridade para os nosos clientes, co cal non estamos en ningún caso en contra da seguridade", dixo Lucía Vázquez, que demandou, non entanto, "seguridade xurídica" para os establecementos á hora de facer inspeccións. "Vemos que hai intención, vocación e actitude por parte do goberno de que así sexa", engadiu tras o encontro.

Nun principio, aclarou, a "desconfianza" con esta instrución por parte do sector "viña dada" por diferenzas que percibiron "entre o que se trasladaba desde o goberno municipal", inspeccións en materia de incendios tras os sucesos de Murcia e Santiago, este último sen danos persoais, e o texto que lles chegou, que "era ambiguo" e daba lugar "a inspeccións máis amplas".

Fronte a isto, expresaron as súas preocupacións ao consistorio tanto por escrito como nesta reunión. "Agora vemos que hai unha intención clara de acoutar o traballo, para que vaia dirixido unicamente ao que é a intención do Concello", apuntaron os hostaleiros, que aseguraron que non teñen "nada que obxectar" e que van "confiar na palabra da alcaldesa".

OUTROS ASUNTOS

Na reunión tamén se revalidou a participación da hostalaría da cidade na campaña 'Fala baixiño', que promove a redución do ruído na rúa e que se presentará de forma oficial este venres, día 1 de decembro. Tamén se presentou un primeiro borrador do que podería ser, nun futuro, a mesa de hostalaría, para establecer un marco de contacto estable entre o Concello e o sector para debater necesidades e chegar a acordos. Unha vez que o sector analice o borrador e póidase dar o seu visto e prace, activarase un proceso que, dixo a rexedora, "necesita unha serie de trámites" para a súa constitución formal. Mentres isto non se produce, comprometeuse a "manter as reunións que sexan necesarias" coa hostalaría.

Reunión co sector da hostalaría | Fonte: CONCELLO DE SANTIAGO