Os bombeiros dos consorcios provinciais só aproban un dos puntos da última oferta: seis días de asuntos propios ao ano

Os sindicatos de bombeiros dos consorcios provinciais contra incendios só aceptan un dos catro principais puntos da última proposta realizada o martes polas administracións, Xunta e deputacións, para tentar pór fin á folga que manteñen desde o pasado mes de xuño. En concreto, segundo un comunicado conxunto das organizacións UGT, CCOO, CIG, Sibgal, CSIF e USO, "unicamente hai acordo nun dos catro puntos", que é o relativo aos días de asuntos propios: un total de seis anuais.

Os representantes dos traballadores xa trasladaron unha resposta escrita (un documento de sete páxinas) á Xunta e ás catro deputacións despois da oferta presentada o martes, na última reunión celebrada no Consello Galego de Relacións Laborais. En canto ao resto de puntos, os bombeiros ven "carente de sentido" fixar as 1.642 horas anuais porque se repartirían en 37,5 semanais, o horario actual do persoal da administración.

Non o aceptan porque será, previsiblemente, a xornada que implantará para toda a cidadanía o Goberno de PSOE e Sumar. Ademais, os sindicatos contan que, en próximos anos, todo o persoal da administración autonómica pasará a traballar 35 horas semanais, polo que trasladaron a súa propia proposta de redución da carga horaria. A estas 1.642 horas anuais hai que sumar outras 158 extraordinarias, segundo a oferta das administracións. Neste sentido, os sindicatos afean que se pretenda que un bombeiro as cubra "por un valor medio de 2.220 euros brutos", que serían 14,05 euros a hora.

"Non hai por tanto ningún incremento salarial. O único que están a ofrecer é facer máis horas extraordinarias pero cobrándoas incluso por baixo do valor da hora ordinaria", que está en 14,18 euros, explican. Así mesmo, censuran que se manterían as diferenzas entre provincias. En canto ao incremento de persoal, a Xunta e as deputacións propoñen un empregado máis por parque. Para os sindicatos, que piden "unha contratación mínima de sete ou oito bombeiros" por cada centro, esta oferta implica que as administracións "non admiten a falta de persoal".

Decenas de bombeiros dos parques comarcais de Galicia durante a protesta por unha mellora das condicións laborais, fronte á Deputación de Lugo, a 31 de outubro de 2023, en Lugo | Fonte: Carlos Castro - Arquivo