18F- Besteiro presentarase como número 1 por Lugo pero non confirma se deixa a acta do Congreso

O candidato socialista á Presidencia da Xunta, José Ramón Gómez Besteiro, confirmou este venres que concorrerá ás eleccións galegas do 18 de febreiro pola provincia de Lugo. "Téñoo claro desde o principio, son candidato nado en Lugo e fíxenme en Lugo", dixo sobre a súa traxectoria política.

Cuestionado se decidiu xa se deixará a acta de deputado no Congreso, manifestou que non ten tomada esa decisión. "Como delegado do Goberno era ineleXible, pero agora non", apostilou.

PIDE DEBATES

Por outra banda, emprazou ao presidente do Executivo galego e candidato do PP aos comicios galegos que se celebrarán o 18 de febreiro, Alfonso Rueda, a "deixar a política de moqueta", en referencia ao Parlamento galego, e a aceptar a celebración de seis debates para "falar" de Galicia.

"Dous de ámbito autonómico e outro catro territorializados", expuxo en declaracións aos medios de comunicación xunto ao secretario xeral do PSdeG, Valentín González Formoso; a vicesecretaria xeral, Lara Méndez e o secretario de Organización do partido, José Manuel Lage.

E é que Besteiro, que confirmou que se presentará pola provincia de Lugo, remarcou que debe achegarse a política á xente para que esta "se enriqueza e se meta de cheo na campaña". "E saiba claramente que ofrecemos uns e outros", engadiu ao argumentar que "desde Madrid lle convocan as eleccións a Rueda" e que "para quitarse esa manta que lle vai a vir e falar das cousas que lle preocupan aos galegos" debería aceptar a proposta socialista.

"Queremos que a xente participe", insistiu sobre o posicionamento do PSdeG a este respecto e polo feito de que estes comicios se celebren despois das festas do Nadal e dos Entroidos, para evitar unha menor participación do electorado.

DISCREPANCIAS DE SUMAR E PODEMOS

Mentres, cuestionado polas discrepancias entre Podemos e Sumar e o feito de que a líder desta formación, Yolanda Díaz, diga que é un socio necesario, Besteiro asegurou que o que ve é "debate de ideas e de pluralidade".

No entanto, remarcou que non só se dá no ámbito das forzas da esquerda. "Vox anuncia que se vai a presentar", lembrou para, a colación, afirmar que sería a non ser que "as negociacións co PP cheguen a bo porto para que haxa unha integración política aquí en Galicia".