A Xunta sobre os xabaríns: "Non hai que deixar nada fóra do colector para que as cidades non se convirtan no seu hábitat"

A conselleira de Medio Ambiente, Territorio e Vivenda, Ángeles Vázquez, defendeu a xestión da Xunta para o control dos xabaríns, que cualificou de "boa", ao ser preguntada nun acto na Coruña pola presenza de novo dos mesmos na cidade e a contorna metropolitana. "Temos un problema co xabaril e estamos a actuar no ámbito natural e rural a través de plans de emerxencia, pero tamén tendemos a man ás cidades", sentenciou. No caso da Coruña, lembrou que hai un protocolo e unha comisión de seguimento.

"Baixan das zonas máis rurais e asíntanse cando teñen alimento, que collen dos colectores", manifestou sobre a presenza de xabaríns nestes núcleos urbanos ou semiurbanos. Por iso, e a pesar de considerar que se está facendo "unha boa xestión" para o seu control, instou á precaución e tamén a non deixar "nada" fóra do colector para que determinadas zonas non se convertan "no seu hábitat". A mesma precaución pediu en caso de atoparse con eles. "Evitar o contacto e evitar accidentes", engadiu con motivo de presenza nun acto do Colexio de Enxeñeiros de Camiños, Canles e Portos.