Localizar desaparecidos en menos de 48 horas, o obxectivo de drons con intelixencia artificial
O sistema 'Dronefinder' xa forma parte dos recursos da Axencia Galega de Emerxencias
Por Europa Press / Redacción | SANTIAGO DE COMPOSTELA | 09/01/2024 | Actualizada ás 17:55
Reducir os tempos de localización de persoas desaparecidas para tratar de dar co seu paradoiro durante as primeiras 48 horas é un dos obxectivos que se marca o sistema 'Dronefinder', que achega á aeronave non tripulada os avances da intelixencia artificial para mellorar a resposta ante o estravío de persoas, especialmente, de maiores con deterioración cognitiva ou que padecen enfermidades como o Alzhéimer.
O proxecto 'Dronefinder', que xa forma parte dos recursos da Axencia Galega de Emerxencias (Axega), foi presentado oficialmente este martes nun acto celebrado na propia sede da axencia na Estrada con presenza do presidente da Xunta, Alfonso Rueda, entre outros cargos do Goberno galego como o seu número dous, Diego Calvo.
O sistema analiza de forma automática e en tempo real imaxes recollidas pola cámara de vídeo que ten incorporada, capaz de captar tamén imaxes térmicas, segundo informou o equipo encargado do desenvolvemento do proxecto, no que participan Aeromedia, Indra e ITG en colaboración co Instituto Tecnolóxico de Galicia (ITG) dentro do Polo Aeroespacial de Galicia.
Esta información é procesada a través dun software de intelixencia artificial adestrado con 40 horas de gravacións recompiladas para desenvolver o algoritmo. Ademais, tamén pode detectar á persoa no caso de que esta porte algún dispositivo electrónico, como pode ser unha pulseira ou reloxo intelixente, así como un 'smartphone'.
Así mesmo, ten capacidade para lanzar avisos directamente aos equipos de emerxencias, o que permite reducir "ao mínimo" os tempos de resposta e optimiza os recursos empregados na procura.
A meta fixada polos promotores é, precisamente, reducir ao máximo o tempo de resposta ante unha desaparición, especialmente nos casos de persoas maiores. Entre estes, segundo datos da asociación SOS Desaparecidos, o 46% dos maiores de 70 anos que se perden padecen a enfermidade de Alzhéimer.
A maioría dos falecidos neste tipo de casos son localizados sen vida nun radio de entre 3 ou 4 quilómetros da súa vivenda ou do lugar onde foron por última vez, como explican os promotores, que tamén apuntan ás vantaxes que ofrece o sistema en casos de desaparicións de persoas en accidentes, actividades de turismo activo ou catástrofes naturais, xa que é frecuente que non teñan a posibilidade de comunicar a súa posición ou achegar referencias que axuden aos equipos de emerxencias.
Durante a presentación, segundo recolle un comunicado, o vicepresidente primeiro da Xunta, Diego Calvo, destacou o "indiscutible selo innovador" co que conta Galicia e que queda reflectido en proxectos como 'Dronefinder', que pon "a tecnoloxía ao servizo da sociedade" con solucións para ámbitos como a sanidade, a educación ou a seguridade.
