Fernández Lores non confirma "ao 100%" a celebración do Entroido ante a falta de orzamentos
O grupo municipal do PSOE de Pontevedra rexistrou unha proposición normativa coa que pretende impulsar unha modificación da Ordenanza Municipal Reguladora da Mobilidade Amable e da Utilización dos Espazos Públicos.
Por E.P. | SANTIAGO DE COMPOSTELA | 11/01/2024 | Actualizada ás 17:35
O alcalde de Pontevedra, Miguel Anxo Fernández Lores, eludiu este xoves confirmar a celebración do Entroido na cidade, alegando a falta de orzamentos. "Non vou garantir ao 100% de que se vaia facer o Entroido", afirmou este xoves nunha comparecencia de prensa. "Estamos a traballar a programación do Entroido, a única dificultade que temos é a consignación orzamentaria para facelo", sinalou.
As festas do Entroido celébranse a segunda semana de febreiro pero a falta de orzamento deixou a programación municipal deste ano sen partidas específicas. En anteriores edicións, o Concello destinou uns 150.000 euros á organización desta celebración popular.
"Imos tentar resolver de modo excepcional, sempre de modo excepcional, as cuestións que consideremos prioritarias, imprescindibles. Entre elas o Entroido", afirmou o rexedor nacionalista, quen subliñou que o de Pontevedra é "o Entroido urbano máis importante de Galicia" e "xera moita actividade económica". "É un tema moi complexo desde o punto de vista administrativo, pero tentaremos facelo", engadiu.
Fernández Lores achacou esta situación á "parálise" que existe no Concello tras o rexeitamento de Partido Popular e PSOE ao proxecto de orzamentos para este 2024. Este "bloqueo" durará ata mediados de marzo, se non hai unha moción de censura. Se a oposición non presenta unha candidatura alternativa á Alcaldía antes do 8 de febreiro, a partir dese día iniciarase a exposición pública das contas deseñadas polo goberno local, resolveranse as alegacións e finalmente entrarán en vigor.
Segundo a explicación reiterada polo alcalde, o servizo de Intervención municipal ten a "necesidade de reter diñeiro para cuestións fundamentais", como o cumprimento dos contratos en execución ou o pago dos gastos de persoal. As partidas que existen no orzamento prorrogado son insuficientes para cubrir esa necesidade económica polo que se fai necesaria esa retención doutras cantidades, indicou.
Fernández Lores citou como exemplo a reforma do edificio histórico da Casa Consistorial, que "estaba previsto que se rematase agora en xaneiro" pero "hai un reformado que non se puido tramitar" e que ten que ser abonado con cargo ao orzamento deste ano, para o que non hai unha partida consignada. Iso "obriga" a atrasar a posta en funcionamento desta sede institucional porque, sinalou, o goberno pontevedrés non considera que esa obra (cun investimento previsto de algo máis de 27.000 euros) sexa "prioritaria". En todo caso, matizou que "non é que o Concello non teña diñeiro", senón que non se poden usar os recursos "por falta dun orzamento actualizado do 2024".
PSOE PIDE MODIFICAR ORDENANZA DE MOBILIDADE
O grupo municipal do Partido Socialista no Concello de Pontevedra rexistrou unha proposición normativa coa que pretende impulsar unha modificación da Ordenanza Municipal Reguladora da Mobilidade Amable e da Utilización dos Espazos Públicos, co obxectivo de favorecer o transporte de menores e o uso de remolques en bicicleta.
Segundo explicou este xoves en rolda de prensa o portavoz local do PSOE, Iván Puentes, o seu grupo levará a Pleno unha proposta que expón cambiar o artigo 9 da actual ordenanza. Concretamente, os socialistas queren engadir un parágrafo ao artigo relativo á circulación de vehículos polas calzadas para permitir que as bicicletas poidan estar dotadas de accesorios adecuados para o transporte diúrno e nocturno de menores, así como de carga, xa sexan animais ou mercadoría (cadeiras axustadas, remolques, semirremolques, semibicis e outros elementos).
