PSdeG esixe á Xunta formación para un "trato digno e sen prexuízos" ás persoas trans
Socialistas reclaman protocolos específicos e formación do persoal público para combater a discriminación.
Por Europa Press / Redacción | Santiago de Compostela | 30/03/2025 | Actualizada ás 16:06
Membros da Executiva do PSdeG e das Xuventudes Socialistas esixiron á Xunta que "garanta" a formación do persoal da Administración pública para "asegurar un trato digno e sen prexuízos" ás persoas trans.
"É imprescindible que en Galicia se actúe con responsabilidade. A Xunta non pode seguir de perfil: debe aplicar protocolos específicos en todas as administracións públicas e garantir a formación do persoal para asegurar un trato digno e sen prexuízos", pediron este domingo na mobilización celebra en Santiago, con motivo do Día Internacional da Visibilidade Trans.
Desta forma, os socialistas galegos reafirmaron o seu compromiso coa igualdade, a inclusión e a defensa dos dereitos das persoas trans. Así, incidiron en que os "avances en dereitos forman parte da entidade política socialista", á vez que enxalzaron a Lei Trans e a Lei Zerolo, aprobadas polo Goberno de Pedro Sánchez.
"Foro feitos históricos que fixeron posible que, en Galicia, preto de 800 persoas modificasen o seu sexo rexistral. Son pasos adiante para o recoñecemento legal, pero a igualdade real aínda está lonxe de ser unha realidade cotiá", sinalaron desde o PSdeG.
Así mesmo, advertiron de que as persoas trans "seguen atopando trabas, discriminación e precariedade" polo que urxiron a acelerar a implementación da Estratexia Estatal para a Igualdade de Trato e Non Discriminación das Persoas LGTBI.
