BNG denuncia "veto" para levar invitados ao pleno
"É unha discrepancia do BNG coa totalidade dos grupos representados nesta casa", din desde o PPdeG.
Por Europa Press / Redacción | SANTIAGO DE COMPOSTELA | 01/04/2025 | Actualizada ás 16:16
A viceportavoz do BNG Olalla Rodil denunciou un "veto" por parte da Presidencia da Cámara galega que lles impide levar invitados ao pleno despois de que nunha sesión do mes de febreiro un grupo da Plataforma Queremos Galego interrompese ao conselleiro de Cultura, Lingua e Xuventude cantando a favor do galego; mentres que o portavoz do PPdeG, Alberto Pazos Couñago, defendeu que é unha medida que toma "o goberno do Parlamento" e que "foron anunciadas a todos os grupos no ano 2013" ante feitos deste tipo.
A preguntas dos medios tras a reunión da xunta de portavoces, Rodil afirmou que ao BNG "impúxoselle un veto a poder levar invitados" ao pleno despois do sucedido en febreiro. Unha "sanción" que a deputada nacionalista considera "arbitraria" por parte da Presidencia do Parlamento, xa que, tal e como apuntou, non poderán convidar "a ningunha persoa á tribuna ata o próximo período de sesións", no mes de setembro.
"É algo que non compartimos e que alegamos e que o PP e o seu presidente mantéñense na decisión, sobre a que vemos discrecionalidade", relatou Rodil, que tamén asegurou que non se lles comunicou formalmente que ían ser "obxecto desa sanción". "Defendemos os nosos dereitos. Pode parecer unha anécdota, pero vemos unha deriva do Parlamento coma se fose a súa leira, achicando a nosa capacidade de desenvolver o noso traballo político de oposición. Non imos permitir ese atropelo e defendemos o noso dereito a seguir convidando a persoas á tribuna", sostivo.
"DISCREPANCIA" DO BNG
Posteriormente, o portavoz do Grupo Popular, Alberto Pazos Couñago, negou que fose "unha sanción", senón que se trata de "medidas que toma o goberno do Parlamento, neste caso o seu presidente, e que foron anunciadas a todos os grupos no ano 2013". Por tanto, veñen aplicando a todos os grupos desde o ano 2013", resolveu. Ademais, o portavoz popular defendeu que non se trata de "unha diferenza ou unha discrepancia entre o PP e o BNG", senón que "é unha discrepancia do BNG coa totalidade dos grupos representados nesta casa".
"O BNG ten unha interpretación de como se debe dirixir o normal funcionamento do Parlamento de Galicia que non coincide coa de ningún dos grupos que avogamos por manter unha relación normalizada entre os grupos, a presidencia e a Mesa desta casa, que é a quen lle corresponde gobernar os designios da mesma. Lamentou de que Rodil non entendese esta cuestión, pero seguro que despois desta explicación terao un pouco máis claro", concluíu.
