Tras sobrevoar en avión a ría de Vigo, o Goberno di que non detectou sacos de pélets nas Rías Baixas

O Goberno non detectou sacos de pélets nas Rías Baixas, onde este venres levou a cabo varias vixilancias co avión AS102 'Rosalía de Castro' e a salvamar Mirach. Seguindo o protocolo establecido este xoves na reunión do Plan Camgal, a Delegación do Goberno en Galicia informou de que este venres Salvamento Marítimo mobilizou o avión AS102 'Rosalía de Castro' desde o aeroporto de Santiago de Compostela, que efectuou voo de detección de sacos de pélets por todas as Rías Baixas. Ademais, tamén mobilizou a salvamar Mirach. Neste caso, efectuou a procura na ría de Vigo. En ambos os casos o resultado foi negativo.

PONTEVEDRA DETECTA OS PRIMEIROS

O Concello de Pontevedra detectou este venres a chegada dos primeiros pélets de plástico ao seu municipio na praia da Posta, en O Cabo. A concelleira de Seguridade Cidadá, Eva Vilaverde, informou de que foron detectados pola Policía Local, que realizaba labores de control e "polo momento hai pouca presenza deles".

Unha vez detectados, explicou, chamaron ao 112 e enviaron un correo electrónico á dirección que determina o Plan de continxencia activado pola Xunta. Tamén llo comunicaron a Presidencia e ás consellerías de Medio Ambiente e de Mar.

Nesta liña, Eva Vilaverde afirmou que a pesar de ser un concello que "non é de praias e as praias son moi pequeniñas", pensaban que os pélets non chegarían ou "tardarían un pouco máis", pero "por desgraza apareceron hoxe".