18F.- O ex coordinador de CC.OO. Ramón Sarmiento, número un por Pontevedra de Sumar

O ex coordinador de Comisiones Obreras (CC.OO.) en Galicia Ramón Sarmiento encabezará a lista de Sumar Galicia por Pontevedra, un posto que xa foi ratificado pola promotora da formación de Yolanda Díaz e que lle permitirá estrearse no mitin deste venres en Vigo xunto á propia ferrolterrá e ao deputado e líder de Máis Madrid, Íñigo Errejón.

A pouco máis de tres días de pecharse o prazo para rexistrar as candidaturas para as eleccións autonómicas do próximo 18 de febreiro, Sumar Galicia aínda non pechou os nomes que concorrerán polas catro provincias, pero continúan as xornadas de traballo e, precisamente, este sábado hai reunión dos grupos para culminar o programa electoral.

Movemento Sumar Galicia, Esquerda Unida e Verdes Equo subscribiron a súa coalición o pasado 4 de xaneiro con Marta Lois como candidata á Presidencia da Xunta, a cal será a número un pola provincia da Coruña. Este acordo outorgaba o un pola Coruña e Pontevedra para Sumar, mentres que reserva a Esquerda Unida os postos segundo e quinto na circunscrición de Pontevedra; o terceiro e o quinto da da Coruña, e dúas na circunscrición de Ourense. Sumar tamén encabezará o primeiro posto de Lugo.

ACTO EN VIGO

O acto de Vigo servirá para a posta de longo de Sarmiento como candidato e tamén de Marta Lois, viguesa de nacemento con orixe no Carballiño. Contará, ademais, coas intervencións da líder de Sumar, Yolanda Díaz, ademais de Íñigo Errejón, que quedará tamén ata este sábado para as reunións da formación. Así mesmo, tamén está previsto que interveña a líder de Esquerda Unida en Galicia, Eva Solla, aínda que, segundo as fontes consultadas, a ex deputada autonómica non sería o nome que achegaría neste momento EU para ocupar o 'tres' de Pontevedra.

Ramón Sarmiento, de CC.OO. | Fonte: CC.OO. - Arquivo