A cultura da doazón entre os escolares galegos: a porcentaxe de rexeitamento das familias cae ao 15,5 %

O conselleiro de Sanidade, Julio García Comesaña, presentou este venres en Santiago as convocatorias dos concursos de carteis e curtametraxes sobre doazón e transplantes, un acto no que puxo aos escolares e os universitarios como colectivos prioritarios para as accións de concienciación acerca da doazón.

Segundo dixo durante o acto, "é cada vez máis habitual non ver negativas" á doazón entre familiares, o que "confirma" a utilidade das campañas de concienciacióm. Os últimos datos apuntan a que a porcentaxe de rexeitamentos en Galicia sitúase no 15,5 %, "o máis baixo de toda a serie histórica".

Para continuar con esta labor, Julio García Comesaña destacou a necesidade de seguir "trasladando á poboación" a "importancia desa doazón" e, moi especialmente, no ámbito educativo, xa que os máis pequenos están "nunha idade que é moi receptiva" para "tomar conciencia desta problemática" e para trasladala ás súas familias.

Así mesmo, mencionou de forma especial a doazón de medula ósea, lembrando que "aproximadamente o 70 % dos pacientes" que precisa un transplante de medula "non dispoñen dun familiar compatible", o que fai necesario "recorrer a través de rexistros internacionais" para buscala "noutras contornas", en moitas ocasións fóra de España.

A poboación diana para facerse doante de medula, lembrou Comesaña, son as persoas entre 18 e 40 anos, motivo polo cal Sanidade centra as campañas de fomento, especialmente, no ámbito universitario. Para a "concienciación" sobre a doazón de medula, o conselleiro admitiu que "custa romper esa imaxe de que é un procedemento doloroso", sinalando que se trata dun proceso "moi sinxelo" e "exactamente igual ao de doazón de sangue".

UNHA CADEA DE PROFESIONAIS

O conselleiro de Sanidade comezou o acto agradecendo a súa labor a todos os funcionarios sanitarios que participan no proceso de doazón, profesionais que "están coordinados as 24 horas do día" para "conseguir que ese órgano vaia á persoa que máis o necesita en cada momento".

García Comesaña tivo palabras de agradecemento, de forma especial, para os coordinadores encargados de contactar coas familias de posibles doantes entre os pacientes que falecen no hospital, que desenvolven "unha labor tan complicada", pero tamén puxo de relevancia a cadea de profesionais que posibilitan unha doazón, como celadores, persoal administrativo, policías, bombeiros, pilotos, controladores aéreos e todos aqueles que participan nese proceso no que, destacou, "pode chegar a haber cen persoas implicadas nun só doante".

"Pero nada diso sería posible sen o máis importante, que é que os propios cidadáns decidan ser doantes, ou as familias, chegado a ese momento tan complicado, queiran facer a doazón", explicou o conselleiro, destacando que "sen esa solidariedade" non sería posible facer transplantes, "a única alternativa que teñen moitas persoas para seguir vivindo".

CONCURSOS

Para continuar a labor de concienciación entre os nenos e novos, Sanidade convocou o sexto concurso de carteis relacionados coa doazón e o transplante de órganos, que contará con dúas categorías, unha para alumnos de quinto e sexto de Primaria e outra para primeiro, segundo e terceiro de ESO. Para cada categoría considérase un primeiro premio dotado de 1.000 euros para material escolar do centro, así como unha tablet tanto para o alumno como para o profesor. O segundo premio está dotado con 500 euros para material para o centro, unha tablet para o profesor responsable e uns auriculares para o alumno.

Así mesmo, tamén se convoca o décimo concurso de curtametraxes, dirixido a alumnos de cuarto de ESO, Bacharelato ou ciclos formativos de grao básico, medio ou superior e estudos artísticos. Este concurso terá un primeiro premio de 1.000 euros en material para os alumnos participantes e outros 1.000 euros para o centro, así como unha tablet para o titor; O segundo premio será de 750 euros para os alumnos, 750 para o centro e unha tablet para o titor.

Por último, Comesaña falou do noveno concurso universitario de curtametraxes relacionadas con doazón e transplantes de medula ósea, orientado a alumnos do tres universidades galegas e centros asociados da UNED na comunidade. O primeiro premio serán 2.000 euros para compra de material informático, audiovisual, deportivo ou de lectura para os alumnos participantes, un segundo premio de 1.500 euros e un terceiro premio de 1.000 euros, para o mesmo fin.

O conselleiro de Sanidade, Julio García Comesaña, intervén non acto de presentación das convocatorias dos concursos de carteis e curtametraxes relacionados coa doazón e os transplantes | Fonte: CONCHI PAZ