O alcalde de Oleiros insulta a un edil socialista: "Me cago na nai que te pariu, fillo de puta"

O alcalde do Concello de Oleiros, Anxo García Seoane, de Alternativa dous Veciños, insultou ao edil socialista Jesús Fernández durante o Pleno municipal celebrado este martes, día 23. "Me cago na nai que te pariu, fillo de puta, porco que es un porco", espetoulle.

Os feitos ocorreron durante unha moción do PSOE para a xestión de terreos públicos en Oleiros. Na mesma, Fernández aludiu ás poxas de parcelas públicas que fixera a esposa do rexedor. "O que non pasa noutros concellos, en ningún concello socialista, é que a muller do alcalde compre parcelas municipais", destacou.

Nese momento, García Seoane dirixiuse ao edil entre insultos. "Me cago na nai que te pariu, fillo de puta, fillo de puta, porco que es un porco", dixo. A continuación, fixo referencia ao historial político de Fernández. "A este elemento botárono da Coruña pola especulación que fixo", explicou, "dándolle obras a empresas ilegais, que non tiñan dereito a coller as obras".

"Impresentable, porco, porco miserable", engadiu o alcalde, entre berros dalgúns membros da corporación municipal. "Manda carallo o que hai que soportar, a estes ególatras de merda, vaia sinvergüencería", concluíu García Seoane, en alusión aos edís do PSOE no Concello de Oleiros.

Arquivo - O alcalde de Oleiros, Anxo García Seoane. CONCELLO DE OLEIROS - Arquivo | Fonte: Europa Press