As axudas para proxectos de grupos operativos para a innovación no agro poden solicitarse desde o venres
Por Europa Press / Redacción | SANTIAGO DE COMPOSTELA | 25/01/2024 | Actualizada ás 15:22
As axudas da Xunta para a execución de proxectos dos grupos operativos da Asociación Europea da Innovación (AEI) no agro galego poderán solicitarse desde este venres. O Diario Oficial de Galicia (DOG) publicou este xoves esta liña de axudas que contará este ano cun orzamento de 2,5 millóns de euros cofinanciados co Fondo Europeo Agrícola de Desenvolvemento Rural (Feader).
O obxectivo destas subvencións, xestionadas pola Axencia Galega da Calidade Alimentaria, é fomentar a innovación no medio rural, en áreas prioritarias de actuación tales como a xestión sustentable dos recursos naturais, sistemas agrarios de produción, cadea agroalimentaria, bioeconomía ou aplicación do TIC ao sector.
Os grupos operativos, que deberán estar formados polo menos por dous membros, buscan iniciar novas formas de cooperación para a execución de proxectos innovadores relacionados coa AEI. A finalidade é resolver un problema ou aproveitar unha oportunidade determinada nos sectores agroalimentario e forestal. Os posibles beneficiarios destas axudas son os agricultores, gandeiros, silvicultores e organizacións representativas deles, centros de investigación ou persoas que desenvolvan por conta propia a súa actividade no ámbito do medio rural.
Tamén se trata de empresas do sector agrícola, gandeiro ou forestal e as súas organizacións representativas, cooperativas agrarias e as súas asociacións e outras entidades que demostren interese no fomento da competitividade da agricultura, na sustentabilidade dos recursos naturais e do clima ou desenvolvemento das economías e comunidades rurais.
