A mostra 'Afonso X e Galicia' poderá verse no Edifici Històric da Universitat de Barcelona ata o 22 de febreiro
Tras abrir as súas portas en Santiago de Compostela, a exposición iniciou a súa itinerancia e pasou por Lugo, Ourense, Cracovia, Roma, Bratislava, Perugia, e Río de Janeiro e actualmente pode visitarse en Nitra (Eslovaquia), Bolonia (Italia)
Por E.P. | SANTIAGO DE COMPOSTELA | 26/01/2024 | Actualizada ás 19:30
A presidenta do Consello da Cultura Galega (CCG), Rosario Álvarez, participou este venres na inauguración da exposición 'Afonso X e Galicia', producida por este organismo, con colaboración da Xunta e da Deputación de Ourense, no Edifici Històric da Universitat de Barcelona, onde poderá ser visitada ata o 22 de febreiro.
O proxecto ten a súa orixe en 2021, cando se cumpriron 800 anos do nacemento de Alfonso X O Sabio e o Consello da Cultura Galega inaugurou unha mostra dedicada a explorar as conexións do monarca con Galicia. Tras abrir as súas portas en Santiago de Compostela, a exposición iniciou a súa itinerancia e pasou por Lugo, Ourense, Cracovia (Polonia), Roma, Bratislava (Eslovaquia), Perugia (Italia) e Río de Janeiro (Brasil).
Actualmente pode visitarse en Nitra (Eslovaquia), Bolonia (Italia) e, desde esta semana, tamén en Barcelona, onde se complementa cun programa de concertos, presentacións de libros e conferencias a cargo de expertos da Universitat de Barcelona, a Universitat Autònoma de Barcelona, a Universidade do Algarve e a Universidade do estado de Santa Catarina de Brasil.
A exposición de Barcelona está comisariada por Antoni Rosell e repasa a vida de Alfonso X, con atención á súa actividade política e familiar, á súa faceta científica, histórica e cultural. Así, poden verse obras e traducións do 'scriptorium' alfonsino, ademais de réplicas de instrumentos musicais dos séculos XII e XIII (cedidos polo Obradoiro de Instrumentos Musicais da Deputación de Ourense) vinculados a óbra cume do monarca, as Cantigas de Santa María.
Tamén se ilustra a vida cotiá do rei e da sociedade da Idade Media mediante unha compilación de imaxes extraídas do Códice Rico, e exponse elementos patrimoniais (pezas de museo, iconografía relixiosa, documentación, etc.) relacionados cronoloxicamente con Alfonso X.
En total, a exposición componse de seis espazos e unha sala central, e con diferentes niveis de lectura, xa que conta con paneis, proxeccións e códigos QR que remiten a un sitio web onde se aloxan os textos, audios e outros documentos citados.
