Milleiros de persoas saen á rúa para pedir cambios e melloras na sanidade pública
A protesta fixada antes da convocatoria electoral, contou coa participación de todos os líderes da oposición. Rueda denuncia a súa politización.
- Rueda contra a protesta da sanidade: "Hai partidos que fan manifestacións e outros facemos actos electorais"
- Pontón e Besteiro critican o estado da sanidade pública: "enfermar en Galicia é un problema"
Por Europa Press / Redacción | SANTIAGO DE COMPOSTELA | 04/02/2024 | Actualizada ás 12:56
Unha masiva manifestación convocada pola Plataforma SOS Sanidade Pública clamou este domingo nas rúas da capital galega contra a deterioración da sanidade e esixiu un sistema público de calidade.
Encabezada pola pancarta da plataforma organizadora, que fixou a data da protesta antes da convocatoria electoral, a marcha reuniu a todos os candidatos dos partidos da esquerda. En concreto, participan Ana Pontón (BNG), José Ramón Gómez Besteiro (PSdeG), Marta Lois (Sumar) e Isabel Faraldo (Podemos Galicia).
No comezo os asistentes coreou consignas como 'menos inventos e máis investimentos', 'Rueda atende, a sanidade non se vende' e 'orzamento digno para a sanidade pública'. Antes do arranque da marcha, o portavoz da plataforma SOS Sanidade Pública cargou contra a situación "lamentable" da atención primaria e as "listas de espera absolutamente inaceptables". Ademais, dixo que non é verdade que estes asuntos "non teñan solución", senón que só é necesario vontade política.
"Chamamos á poboación a que se non hai un cambio na política sanitaria, haberá que ir pensando en cambiar os autores das políticas sanitarias", sostivo.
CRÍTICAS DE RUEDA
Pola súa banda, o presidente da Xunta e aspirante do PPdeG á reelección, Alfonso Rueda, atribuíu un perfil "electoralista" á manifestación en defensa da sanidade pública convocada este domingo en Santiago de Compostela aínda que a protesta estaba convocada antes de que el mesmo fixara a data das eleccións. E, a modo de argumento, citou o mitin central que os populares celebraron na praza de touros de Pontevedra, antes de concluír que hai partidos, como o PP, que "organizan actos electorais" mentres que outros "fan manifestacións".
OPOSICIÓN
Os principais líderes da oposición en Galicia denunciaron este domingo a "deficiente" situación na que se atopa a sanidade pública en Galicia e criticaron a falta de medios e persoal que existe no Sergas. Foi mentres participaron na masiva manifestación convocada por SOS Sanidade Pública en Santiago de Compostela para esixir melloras no sistema.
