Pleno extraordinario en Vigo ante "os malos tratos" da Xunta sobre non cofinanciar as obras en Balaídos
O alcalde de Vigo, Abel Caballero, abordar "a decisión da Xunta de asignar 5 millóns de euros para o campo de fútbol da Malata en Ferrol e dedicar cero euros para o campo do Celta, para Balaídos".
Por Europa Press / Redacción | Vigo | 06/02/2024 | Actualizada ás 18:00
O alcalde de Vigo, Abel Caballero, anunciou este martes a convocatoria dun pleno extraordinario, a petición do grupo de goberno, para abordar "a decisión da Xunta de asignar 5 millóns de euros para o campo de fútbol da Malata en Ferrol e dedicar cero euros para o campo do Celta, para Balaídos".
Nunhas declaracións gravadas e remitidas aos medios, o rexedor olívico sinalou que esa decisión do goberno galego é "escandalosa", e denunciou que a Xunta "nega a Vigo" calquera axuda para a reforma do estadio municipal, primeiro con Feijóo como presidente e agora con Alfonso Rueda. "É un escándalo e vai ser tratado no pleno", proclamou.
Segundo explicou, someterase ao pleno esa decisión "inadmisible", de negar recursos para Balaídos, mentres o PP de Vigo "queda calado", e manifestou a súa esixencia de que "Vigo sexa tratada exactamente igual que o resto de cidades de Galicia".
O alcalde reiterou que Rueda "maltrata" á cidade olívica e "non quere que progrese", e mesmo trasladou as súas "dúbidas" de que o presidente da Xunta "deixe" ao presidente da Deputación de Pontevedra, Luís López, asinar un convenio para achegar recursos á reforma de Balaídos. "Así que haberá un pleno extraordinario e no pleno, que convocarei para a próxima semana, tratarase a desconsideración e os malos tratos da Xunta á cidade", sentenciou o alcalde.
