Bombeiros de Pontevedra denuncian falta de persoal e acusan o Concello de "deixar ao azar a seguridade"

Os representantes sindicais dos bombeiros de Pontevedra denunciaron falta de persoal no servizo e acusaron ao Concello de "deixar ao azar a seguridade dos seus cidadáns e dos seus funcionarios". Nunha nota de prensa, explican que durante a madrugada do 24 de febreiro a dotación de garda do parque recibiu unha chamada de alerta sobre un incendio na rúa Virxe do Camiño. Ata alí desprazouse un equipo composto por un cabo, dous bombeiros e dous condutores, coa autobomba e a autoescalera.

Nese incendio, continúan, rescataron a unha persoa do interior da vivenda, con graves queimaduras e inconsciente, ao cal se lle realizaron as manobras de reanimación ata a chegada dos servizos sanitarios. Segundo a versión dos bombeiros, mentres os servizos sanitarios prestaban atención médica á vítima, a dotación dedicouse a extinguir o incendio nunha habitación e a ventilar a vivenda sinistrada.

Nese momento, os bombeiros foron requiridos para asistir nun accidente de tráfico na N-550, con vítimas atrapadas dentro dun vehículo. Así, a dotación de garda "vese obrigada a redobrar os seus esforzos, abandonando temporalmente o lugar do incendio, volvendo ao parque a coller o vehículo de rescate e dirixirse cara ao lugar do accidente, no cal rescataron, xunto cos servizos sanitarios, a dúas persoas do interior do vehículo". Ao finalizar esta intervención, regresaron ao piso incendiado para realizar as tarefas de remate e recoller o material alí deixado. Para os Bombeiros, esta manobra deixa constancia de "unha realidade preocupante": "A falta de persoal no servizo de bombeiros de Pontevedra".

Así mesmo, nesta mesma garda pola tarde, relatan que se deu de novo o caso de dividir a dotación, un condutor e un bombeiro nun incendio nunha vivenda en Cotobade e un mando cun bombeiro e un condutor cortando unha árbore que corría risco de caída en Pontesampaio, "deixando a cidade de novo sen bombeiros durante case unha hora".

"En momentos de emerxencia, cada minuto conta e pode marcar a diferenza entre a vida e a morte. É inaceptable que o goberno local siga deixando ao azar a seguridade e o benestar dos seus cidadáns e dos seus funcionarios", conclúe o comunicado.

O parque municipal de Bombeiros de Pontevedra. PP