Comeza o reconto da emigración coa dúbida se haberá algún cambio de escano en Ourense
Arxentina e Suíza son os países desde os que máis galegos na emigración emiten a súa papeleta.
Por Europa Press / Redacción | SANTIAGO DE COMPOSTELA | 26/02/2024 | Actualizada ás 10:19
O reconto dos votos do Censo Electoral de Residentes Ausentes (CERA) arrincará este luns e poderá facer variar un escano na provincia de Ourense, onde o PSOE podería lograr un segundo deputado á conta do PP ou do BNG.
En concreto, segundo os datos da Xunta Electoral, uns 29.300 galegos emitiron o seu voto desde a emigración, dos cales case 6.150 fixérono con destino á provincia de Ourense, a única na que un escano podería variar tendo en conta que o Partido Socialista quedou a 112 sufraxios de obter un segundo escano.
A provincia da Coruña é a que máis votos recibe do exterior, con 10.924 papeletas emitidas; seguida pola de Pontevedra, con case 8.826 sufraxios. Por detrás sitúase a de Ourense, onde son 6.150 papeletas as quie poderían mover o taboleiro debuxado o domingo en beneficio do PSOE, tendo en conta que quedou a 112 votos de obter un segundo deputado pola provincia, que elevaría a representación dos socialistas no Pazo do Hórreo a 10 parlamentarios. Pola súa banda, case 3.300 persoas residentes ausentes votaron na provincia de Lugo.
ARXENTINA, SUÍZA E FRANCIA
O país que máis votos emite é Arxentina, con 7.900 votantes, sendo a provincia da Coruña a maior destinataria, con máis de 2.700, seguida de Pontevedra cuns 2.400. Por detrás sitúanse Lugo e Ourense, cuns 1.300 cada unha.
Un total de 4.476 persoas emitiron o seu voto desde Suíza. En concreto, 2.123 fixérono á provincia da Coruña, 377 a Lugo, 1.047 a Ourense e 929 a Pontevedra. Pola súa banda, 11 figuran como descoñecida.
Ademais, desde Francia depositaron a súa papeleta 2.331 persoas, das cales 526 fano na provincia da Coruña, 796 na de Pontevedra, 720 en Ourense e 278 en Lugo.
Desde Uruguai votaron unhas 2.300 persoas, sendo tamén as de Pontevedra e A Coruña as provincias que máis reciben, con 1.231 e 737 sufraxios. En terceiro lugar sitúase Ourense, con 212 e en cuarto Lugo, con 153.
Nos consultados de Venezuela contabilizáronse 1.840 votos, sendo neste caso tamén a provincia da Coruña a que máis recibe 589. Por detrás sitúanse Ourense, con 556; Pontevedra, con 473 e Lugo, con 222.
RUEDA
O presidente da Xunta en funcións, Alfonso Rueda, confía en que o PP consiga "tamén un apoio importante" do voto emigrante, cuxo reconto arrinca este luns, pero non condicionará a maioría de 40 deputados conseguidos hai unha semana. Así, ve máis probable que poida afectar o número de deputados do BNG e do PSdeG, concretamente pola provincia de Ourense.
