A Xunta ve "precipitada" a decisión do Constitucional de manter suspendida a lei galega do litoral e pide "repensalo"

A Xunta de Galicia recibiu con "sorpresa" a decisión do Tribunal Constitucional de manter suspendida a práctica totalidade da lei de xestión do litoral impulsada pola Xunta e, tras cualificar a decisión de "moi precipitada", insistiu na normativa "protexe a costa e a economía" da comunidade. En declaracións aos medios durante unha visita á empresa Iberconsa en Vigo, a conselleira de Medio Ambiente, Territorio e Vivenda, Ángeles Vázquez, recoñeceu que o auto do Constitucional colleu "por sorpresa" ao goberno galego.

Así, expresou que a decisión "é moi precipitada" porque non figuraba na orde do día do pleno do tribunal e apuntou que, á espera de recibir o auto, "deberían repensalo un pouco e ditar sentenza canto antes" porque a súa decisión "vai en contra dos intereses de Galicia". En todo caso, a conselleira insistiu en que esta lei "protexe a costa e a economía" galega. "Non alcanzamos a saber por que se di que, lonxe de protexer a nosa costa, vai sufrir consecuencias de carácter ambiental", afirmou.

Por outra banda, Ángeles Vázquez tamén reclamou "explicación dos motivos" polos que se abordou esa cuestión por parte do Tribunal Constitucional sen estar na orde do día e, así mesmo, mostrou a súa estrañeza porque queden suspendidos "case todos os artigos" da lei, fóra de tres deles, entre os que está o relativo á necesidade de que Goberno pida a Galicia informe socioeconómico e de afectación ás augas, en caso de querer realizar calquera investimento en dominio público marítimo terrestre.

O presidente de Iberconsa, Alberto Freire, e a conselleira de Medio Ambiente, Territorio e Vivenda, Ángeles Vázquez, asinan a adhesión do grupo empresarial á Alianza Galega polo Clima | Fonte: Europa Press