O PPdeG e BNG din que Galicia perderá proxectos importantes sen os PGE
Por E.P. | SANTIAGO DE COMPOSTELA | 15/03/2024 | Actualizada ás 16:22
A secretaria xeral do PPdeG, Paula Prado, criticou a "renuncia" do presidente do Goberno, o socialista Pedro Sánchez, a que España conte cuns Orzamentos Xerais do Estado (PGE) para este ano porque isto suporá que "Galicia perderá investimentos e proxectos fundamentais para o seu futuro", antes de reivindicar que os populares "seguirán insistindo, esixindo e reivindicando" o que corresponde á comunidade.
"Nós xa non confiabamos en que Sánchez sacara adiante ningún proxecto beneficioso para Galicia, con ou sen orzamentos. Pero moito menos sen orzamentos", afeou, en rolda de prensa, Paula Prado, quen se remitiu ao anuncio realizado polo presidente galego, Alfonso Rueda, sobre o encargo dun informe sobre as consecuencias que terá para Galicia a ausencia de PGE.
A continuación, contrapuxo o que sucede en Galicia, onde os galegos contan "cun Goberno que se debe única e exclusivamente" aos cidadáns, e o que pasa en España, onde "os que non obtiveron a confianza maioritaria da cidadanía cando lla pediron débense só aos intereses dos socios que os manteñen no poder".
"A lei que Sánchez nos vendeu como a gran solución aos problemas de España e como un elemento de concordia e estabilidade profunda na crispación e a inestabilidade", esgrimiu Prado, á vez que concluíu que "Sánchez cre que gaña cando en realidade quen perde é España e, por tanto, perde tamén Galicia".
BNG
Tamén o deputado electo do BNG Luís Bará cualificou de "mala noticia" a falta de orzamentos xerais do Estado para o 2024 e sostivo que este feito "atrasará algúns proxectos que estaban en carteira" para Galicia.
Así o manifestou este venres ao ser preguntado pola decisión do Goberno de non continuar coas negociacións para aprobar as contas tras a convocatoria das eleccións catalás. Ademais, sobre se esta renuncia afectará o acordo de goberno entre o BNG e o PSOE, Bará, que se remitiu ás declaracións efectuadas polo portavoz do BNG en Madrid, Néstor Rego, sostivo que hai partes do acordo que se poderán desenvolver co orzamento prorrogado.
"Non quere dicir que non se poidan desenvolver algunhas partes do acordo, senón que hai cuestións que están en marcha ou que están pendentes de desenvolver", afirmou.
