O BNG desdeña o informe dos letrados do Senado contra a amnistía
Considera que deberá ser o Tribunal Constitucional e non o Senado quen ditamine que a norma é ou non constitucional.
Por Europa Press / Redacción | MADRID | 19/03/2024 | Actualizada ás 12:50
O deputado do BNG no Congreso, Nestor Rego, restou importancia ao informe dos letrados do Senado contra a Lei de Amnistía, pois considera que deberá ser o Tribunal Constitucional e non eles quen ditamine que a norma é ou non constitucional, e en todo caso alertou contra o 'lawfare' que ao seu xuízo practican xuíces "ao servizo do PP e Vox" contra decisións tomadas democraticamente polo Congreso.
"Temos un aparello xudicial ultra reaccionario e ao servizo das forzas máis ultras que se opoñen a calquera tipo de avance social e democrático, especialmente o PP e a ultradereita de Vox", apuntaba Rego este durante unha rolda de prensa este martes no Congreso.
Algo que ao seu xuízo supón unha "constatación máis" de 'lawfare' ao haber poderes do Estado que "non se axustan" ás decisións que toman democraticamente outros poderes do Estado, como a Cámara Baixa.
Así o considerou ao ser preguntado polo informe dos letrados do Senado coñecido este luns no que apuntan a unha posible inconstitucionalidade da norma. Segundo Rego, quen debe decidir se é inconstitucional é o Tribunal Constitucional a pesar de que o PP "fíe todo" a este tipo de análise.
"O PP tamén fiou todo á Comisión de Venecia", apuntaba e aseguraba que aos 'populares' saíulles "o tiro pola culata" co ditame da comisión. Segundo o portavoz do BNG o informe "non di en ningún momento" que non se poida aprobar a Lei de Amnistía e "moito menos" que non sexa constitucional. "Todo o contrario", remarcou, asegurando que o que considera é que a norma aprobada "reforza a convivencia".
