Evacuado un condutor tras envorcar co seu vehículo en Ramirás

Un condutor tivo que ser evacuado este venres tras envorcar co seu vehículo no municipio ourensán de Ramirás. Segundo informou o 112, os membros do GES Terras de Celanova tiveron que intervir, sen ser necesario o uso de material de excarceración, na evacuación do ferido, que, tras ser liberado, foi trasladado nun helicóptero medicalizado.

O servizo tivo constancia deste accidente ás 11.45 horas. Unha persoa particular contactaba a esa hora cos xestores de emerxencias para avisar dun coche envorcado na beirarrúa da OU-531, no lugar de Veiga, en Penosiños, no concello de Ramirás.

Segundo o relato deste alertador, a persoa atopábase no interior do coche e parecía que o seu estado era de gravidade, Ademais, engadía que tiñan dificultades para sacar á persoa do vehículo, pois o cinto de seguridade impedíallo. Desde o 112 Galicia pasouse aviso ao Servizo de Urxencias Sanitarias de Galicia-061, que derivaron ao momento o helicóptero medicalizado con base en Ourense.

Do mesmo xeito foron informados os membros do GES Terras de Celanova, que tamén se desprazaron enseguida ao lugar. Así mesmo, os xestores do 112 puxeron os feitos en coñecemento dos axentes de Tráfico e dos efectivos da Agrupación de Voluntarios de Protección Civil da Mancomunidade Terras de Celanova.

Con todo, xa no punto, os membros do GES confirmaron ao 112 Galicia, que, tras liberar ao ferido e único ocupante do vehículo, o persoal sanitario procedeu coa súa evacuación na aeronave.

Sala de operacións 112 Galicia | Fonte: XUNTA - Arquivo