Rueda fará campaña na recta final nunhas eleccións vascas dominadas pola pantasma de ETA

Catro presidentes autonómicos do PP, o andaluz Juanma Moreno, o galego Alfonso Rueda, a balear Marga Prohens e o castelánleonés Alfonso Fernández Mañueco, viaxarán este mércores a Bilbao para arroupar ao candidato do seu partido a lehendakari, Javier de Andrés, ante as eleccións vascas deste domingo, nun acto que previsiblemente terá protagonista Bildu tras as palabras do seu candidato, Pello Otxandiano, negándose a chamar "terrorista" a ETA.

O acto, que terá lugar no Palacio Euskalduna baixo o título 'Sociedade Aberta', prodúcese un día despois da visita á mesma cidade da presidenta da Comunidade de Madrid, Isabel Díaz Ayuso, que arremeteu contra "un PNV travestido" que, segundo dixo, votou "todas as barbaridades ultras de esquerdas" de Pedro Sánchez.

FEIJÓO ENVORCARASE O XOVES E O VENRES

O xoves e o venres será o presidente do PP, Alberto Núñez Feijóo, o que se implicará de cheo na recta final de campaña vasca para arroupar ao seu partido con visitas ás tres provincias do País Vasco antes da cita coas urnas do 21 de abril.

O PP ASPIRA A CRECER E SER "DECISIVO"

Fai catro anos, o entón presidente do PP, Pablo Casado, optou pola coalición PP+Cs para as eleccións vascas pero só logrou seis escanos, lonxe do resultado esperado e non conseguiu frear a entrada de Vox no Parlamento vasco cun deputado.

Agora, os 'populares' aspiran a mellorar os seus resultados. "Queremos subir en votos, en escanos e ser decisivos", afirmou este luns o portavoz do partido, Borja Sémper, quen denunciou a incongruencia entre PSOE e PSE con respecto aos pactos con Bildu, un "balbordo" que ao seu xuízo é "froito da necesidade de Sánchez" por manterse no poder.

As declaracións do candidato de EH-Bildu a lehendakari, Pello Otxandiano, descartando cualificar a ETA como banda terrorista e sinalando que foi un "grupo armado" están a marcar a recta final da campaña. A portavoz do Goberno, Pilar Alegría, cargou con dureza contra Bildu tras esas palabras asegurando que se trata de "negacionismo incompatible coa democracia", aínda que recoñeceu que seguirá buscando o seu apoio no Congreso.

Tamén o candidato socialista a lehendakadi, Eneko Andueza, criticou "a indecencia, covardía e baixeza moral" de Otxandiano, engadindo que non se pode "permitir que esa xente goberne e moitísimo menos que goberne grazas" aos socialistas.

FEIJÓO PIDE "DESENMASCARAR" O "CINISMO" DO PSOE

As declaracións de Pilar Alegría na rolda de prensa posterior ao Consello de Ministros e de Andueza tiveron unha reacción inmediata por parte do PP, que tachou de "hipócrita" ao Goberno e ao PSOE por criticar agora a Bildu "tras blanquearlo cos seus pactos", segundo aseguraron fontes da formación.