Galiza Nova lanza a súa campaña para o 1 de maio: "A mocidade ten que sindicarse para lograr dereitos que o sistema lle nega"

Galiza Nova, a organización xuvenil do BNG, presentou este martes a súa campaña de cara ao 1 de maio, Día Internacional dos Traballadores, coa que pretenden profundar na "necesidade de sindicalización" da mocidade galega e promover á CIG como referente para facelo. "Lanzamos esta campaña para concienciar á mocidade galega da importancia de sindicarse como unha ferramenta elemental para conquistar os dereitos laborais que o sistema nos nega", reivindicou Paulo Alonso, un dos responsables nacionais de Emprego, Vivenda e Servizos Públicos da organización.

Nesta liña, Galiza Nova explicou que a campaña está orientada á mocidade traballadora ou que está a piques de comezar a traballar, para que saiban "por que é importante a organización na CIG ou que facer para entrar no sindicato". Así, a campaña desenvolverase durante as próximas semanas con actos en colaboración co sindicato nacionalista. Terá unha parte enfocada en redes sociais, onde a través de vídeos explicarán este tipo de cuestións, e tamén participarán nas mobilizacións que a CIG convoque para o 1 de maio.

Pola súa banda, a secretaria xeral da organización xuvenil, Marta Gómez, denunciou que a mocidade galega leva anos "sufrindo as consecuencias das políticas do sistema capitalista" que, engadiu, obrígaos " á emigración forzosa ou á precariedade máis absoluta". "É unha realidade que polo feito de ser mozos sufrimos maior temporalidade nos nosos contratos, temos soldos máis baixos e non podemos desenvolver os nosos proxectos de vida no noso país como nos gustaría", apuntou Gómez antes de insistir en que, por ese motivo, "é importante que a mocidade coñeza a CIG e dea o paso a organizarse e avanzar polos dereitos laborais".

Galiza Nova presenta a súa campaña para o 1 de maio | Fonte: GALIZA NOVA