Verín acolle unha proba internacional de ciclismo de montaña nun dos mellores circuitos de España
Máis de 200 riders daranse cita os días 27 e 28 de abril no monte Montemaior en Cabreiroá para competir na 'Copa de España DHI Pozo do Demo 2024'.
Por Galicia Confidencial | Verín | 24/04/2024 | Actualizada ás 09:00
O Club Deportivo Bicicletas Chinquena Racing Team organiza, co patrocinio do Concello de Verín, a segunda edición do Trofeo Federación DHI Cabreiroá. Máis de 200 riders daranse cita os días 27 e 28 de abril no monte Montemaior en Cabreiroá, poñendo a proba as suas habilidades e servindo de escaparate para o que por moitos xa é considerado un dos mellores circuitos de España. O evento conta tamén co apoio da Real Federación Española de Ciclismo, Federación Galega de Ciclismo e Xunta de Galicia.
O evento foi presentado o pasado luns 22 de abril por Manuel Sanmamed, membro da directiva do Club Deportivo Bicicletas Chinquena Racing e responsable de Seguridade do circuíto; e contou coa presenza de Diego Lourenzo, tenente de alcalde e concelleiro da área de Deportes; Julio Viéitez, concelleiro de Servizos Públicos; e Manuel Pérez, delegado provincial de Deportes da Xunta de Galicia.
Diego Lourenzo, comentaba que "quero expresar o meu máis sincero agradecemento aos organizadores desta proba que, coa súa dedicación e esforzo, fixeron posible un evento deportivo de primeiro nivel que enriquece a nosa comunidade e promove un estilo de vida saudable". Na súa intervención, destacou tamén o valor da internacionalización desta competición "que pon a Verín no mapa, posicionándoo como un destino de referencia para eventos deportivos de alto nivel".
COMPETICIÓN INTERNACIONAL
A competición, a única en España que ten carácterer internacional na súa categoría (UCI-C2), está rexida pola normativa nacional e disputarase os días 27 e 28 de abril no circuíto de descenso de Cabreiroá, que ten unha lonxitude de 1,78 km e un desnivel de 340 metros. Cabe destacar tamén que esta proba é a única do calendario nacional que outorga puntos para a Copa do Mundo. "Este carácter internacional da mesma atraerá a Vila do Tamega corredores de todas as partes do mundo", salientaron desde a organización.
As categorías da proba son: Elite UCI, Sub 23, Junior, Cadete, Infantil, Master 30, 40, 50 e 60, tanto para homes como para mulleres.
Información da proba na web da Federación Galega de Ciclismo.
