Presentada a décima edición do Día de Colón, a festa que reivindica a orixe galega do navegante

O Palacete das Mendoza, sede de Turismo Rías Baixas, acolleu este venres a presentación da décima edición do Día de Colón que se celebrará en Poio os días 10 e 11 de maio para reivindicar a orixe galega do navegante.

Esta festa pon en valor a teoría da ascendencia galega de Cristóbal Colón e, para iso, encheranse as rúas do núcleo histórico de Combarro de cor e animación medieval, repetindo o éxito de edicións anteriores e fomentando a implicación de numerosos colectivos locais. A programación inclúe mostras de produtos artesanais, tiro con arco, obras teatralizadas e música itinerantes, entre outras propostas.

O presidente da Deputación de Pontevedra, Luís López, destacou a importancia deste tipo de festas culturais pola súa capacidade para "enriquecer o noso destino turístico, porque dinamiza a nosa economía e porque nos fan vivir experiencias 100 % Rías Baixas".

Luís López lembrou que esta festa leva "unha década conmemorando que o navegante máis famoso do mundo era da provincia, de Poio" á vez que se fomenta "a historia e cultura mariñeira" e exáltase " o medio natural, a gastronomía e estilo de vida".

Pola súa banda, o alcalde de Poio, Ángel Moldes, animou a toda a cidadanía a visitar Combarro o próximo fin de semana para celebrar o Día de Colón e felicitou ao hostaleiro Ramón Pedras 'Petete' polo seu nomeamento como pregoeiro desta festa. Moldes lembrou que xa na primeira edición pediron a Petete que fose o pregoeiro, pero negouse e dixo que o sería na décima edición. Agora, esa data chegou.

Durante os últimos días Petete percorreu todos os colexios de Poio para difundir entre o alumnado a teoría do Colón galego, neste percorrido estivo arroupado polos colectivos Combrus, Leucoíña e Vides Novas. O Concello de Poio lembra que ata o vindeiro martes permanecerá aberto o prazo para reservar espazo para as comidas e ceas de particulares o sábado 11 de maio.