O PP de Pontevedra denuncia a "gran estafa" do PSOE local co 'Pontevedra Flúe': "Non hai rastro do investimento"

Os concelleiros do Partido Popular de Pontevedra Rafa Domínguez e Pepa Pardo denunciaron a "gran estafa" do PSOE local ao verificar, afirmaron, nunha resposta do Goberno de España, que "os proxectos da estratexia 'Pontevedra Flúe' nin existen nin existiron nunca". Nunha rolda de prensa celebrada este xoves, o portavoz municipal do PP criticou a "falta de ética" dos socialistas, cada vez que se aproxima un período electoral. Domínguez lembrou que o PSOE local comprometera 25 millóns de euros do Goberno de España no proxecto de 'Pontevedra Flúe', "dos que non hai nin rastro".

A senadora popular, Pepa Pardo preguntou por escrito ao Ministerio para a Transición Ecolóxica e Reto Demográfico se hai reservada unha partida orzamentaria, a cargo dos fondos europeos Next Generation, para financiar os proxectos de recuperación ambiental que o PSOE recolle na súa estratexia 'Pontevedra Flúe' e a resposta obtida revela, dixo, "a gran mentira do PSOE de Pontevedra".

LORES: É "UNHA NOTICIA REVENIDA"

O alcalde de Pontevedra, Miguel Anxo Fernández Lores, sinalou hoxe que esta é "unha noticia revenida" pois el mesmo xa informou, hai uns meses, dixo, de que "non estaban comprometidas esas partidas económicas anunciadas polo PSOE, tras reunirse coa ministra Teresa Ribera". Pepa Pardo insistiu en que "o 'Pontevedra Flúe' foi un bulo máis dos socialistas da cidade, que repiten cada vez que hai eleccións" pois "na súa resposta o Goberno pon de manifesto que non saben nin cales son eses proxectos".

En rolda de prensa, a concelleira do PP solicitou que o portavoz municipal do PSOE, Iván Puentes, explique aos cidadáns "onde está esa choiva de 25 millóns de euros que anunciou que se destinarían a proxectos, licitados, contratados e executados polo Goberno de España, en Pontevedra, antes de 2025".

O portavoz do PP de Pontevedra e candidato á Alcaldía, Rafa Domínguez, xunto a Pepa Pardo | Fonte: PP - Arquivo