A Olimpíada das motos, o International Six Days Enduro, chega por primeira vez a Galicia en outubro
Silleda será o centro de operacións desta proba que atraerá a máis de 3.000 visitantes afeccionados ao motociclismo.
Por Europa Press / Redacción | PONTEVEDRA | 05/06/2024 | Actualizada ás 16:43
O International Six Days Enduro, coñecida como a Olimpíada das motos, celebrarase en outubro por primeira vez en Galicia, con Silleda como centro de operacións desta proba que atraerá a máis de 3.000 visitantes afeccionados ao motociclismo. A Deputación de Pontevedra presentou este mércores o International Six Days Enduro, cuxa competición se levará a cabo entre os días 14 e 19 de outubro e desenvolverase nas provincias de Pontevedra, A Coruña e Ourense, aínda que o centro de operacións estará en Silleda, no recinto feiral da Semana Verde.
Ademais, os municipios da Estrada e Lalín formarán parte do percorrido desta proba que se completará con outros tramos no Irixo e Santiago de Compostela. O International Six Days Enduro é a competición máis antiga desta modalidade de motociclismo, con 98 edicións celebradas. España xa acolleu en cinco ocasións este evento pero é a primeira vez que recala en Galicia, co interior da provincia de Pontevedra como escenario principal.
Durante a presentación deste evento deportivo o presidente da Deputación de Pontevedra, Luís López manifestou que "vai ser un éxito seguro" porque se desenvolve nun territorio que xa tivo unha toma de contacto co enduro importante, como é Lalín, que acolleu probas do mundial no 2022 e 2023; e engadiu que "lévase a cabo a través dun clube e unha Federación que son exemplo á hora de organizar estes eventos".
A celebración desta competición na provincia de Pontevedra suporá acoller durante case 15 días a preto de 600 pilotos chegados desde países dos cinco continentes e que se converterán en "proscriptores" deste destino turístico xa que "cando volvan os seus países falarán do bonita que é a provincia de Pontevedra". Luís López tamén incidiu no "compromiso co medio ambiente desta proba deportiva" xa que os organizadores deseñaron un proxecto para minimizar a pegada de carbono a través da redución da contaminación, a limitación do ruído e a plantación de árbores.
O presidente da Deputación tamén destacou a "aposta polo deporte" que está a levar a cabo o goberno provincial a través de iniciativas como o Plan Extraordinario de Infraestruturas Deportivas, as bolsas e axudas a deportistas, clubes e federacións; a visibilidade e fomento do deporte feminino ou a organización de eventos deportivos de interese xeral para "consolidar a provincia como destino turístico ligado ao deporte e impulsar a actividade económica e social en todo o territorio".
