O Goberno prepara a licitación do estudo de viabilidade para conectar Santiago e Lugo por tren
Néstor Rego solicitaba información o pasado mes de abril sobre este proxecto.
Por Europa Press / Redacción | SANTIAGO DE COMPOSTELA | 09/06/2024 | Actualizada ás 17:45
O Ministerio de Transportes e Mobilidade Sustentable confirmou que traballa na licitación dun estudo de viabilidade para avaliar a posible conexión ferroviaria de Santiago de Compostela e Lugo.
Así o confirma o Goberno central a través dunha resposta escrita a unha pregunta do deputado do BNG, Néstor Rego, quen o pasado mes de abril solicitaba información sobre este proxecto de unión por tren de ambas as cidades.
Aínda que a resposta do Ministerio, datada a 24 de maio, non ofrece máis detalles, si cabe lembrar que o pacto do Bloque e o PSOE para a investidura de Pedro Sánchez de 2023 recolle como un dos puntos que se licitará xa en 2024 un estudo "dunha variante entre Curtis e Ordes", na provincia da Coruña, que facilite a conexión ferroviaria entre Santiago e Lugo.
Trátase dunha demanda que tamén sosteñen outros partidos políticos e colectivos a favor de contar con máis servizos ferroviarios na capital lucense.
