Preséntanse seis denuncias por estafas de miles de euros a través de suplantación de empresas en Ourense
Empregando a técnica coñecida como 'vishing', na que as vítimas reciben mensaxes ao seu teléfono móbil nas que se lles require o abono de diñeiro.
Por E.P. | SANTIAGO DE COMPOSTELA | 14/06/2024 | Actualizada ás 17:23
A Garda Civil recibiu no mes de maio seis denuncias presentadas en cinco concellos da provincia de Ourense por estafas de miles de euros cometidas a través da suplantación de empresas por mensaxes fraudulentas enviados a teléfonos móbiles reclamando diñeiro. Tras unha alerta emitida polo 'Equipo @' de Ourense en maio ante a detección dun aumento destas tentativas de estafas empregando a técnica coñecida como 'vishing', na que as vítimas reciben mensaxes ao seu teléfono móbil nas que se lles require o abono de diñeiro, a Garda Civil rexistrou seis denuncias nas últimas semanas sobre feitos delituosos deste tipo.
Así, segundo informou a Benemérita este venres, tres persoas denunciaron na Rúa, Xinzo de Limia e Ourense ser estafadas con 1.600, 2.682 e 1.600 euros, respectivamente, a través dunha mensaxe fraudulenta na que se solicitaba diñeiro para desbloquear unha operación en nome da compañía enerxética Naturgy. Ademais, tamén recibiron outras dúas denuncias de cidadáns residentes en Lobios por 4.200 euros e outra de 1.100 euros dun veciño de Viana do Bolo. En ambas, empregouse o nome de Repsol para enganar ás vítimas.
