Veciños e sanitarios concéntranse ante centros de saúde do Barbanza para denunciar a falta de médicos

Decenas de veciños e profesionais sanitarios volvéronse a concentrar no mediodía deste venres fronte a varios centros de saúde da comarca do Barbanza para denunciar a falta de médicos, o que complicará a asistencia de cara ao verán. Estas protestas continúan as que comezaron xa a mediados de maio por este mesmo motivo ante os centros de saúde de Ribeira (incluídos os ambulatorios de Aguiño e Palmeira), Boiro e Rianxo.

Segundo explica a Europa Press a portavoz da Plataforma en Defensa da Sanidade do Barbanza e dirixente da CIG, Marián Rodríguez, desde a concentración de Rianxo, neste municipio hai catro médicos traballando do oito prazas que existen, polo que cada facultativo debe atender dúas cotas. Ademais, "non hai citas ata xullo" neste centro. Tal e como denuncia, esta situación replícase en Ribeira, onde faltan tamén cinco de 10 médicos que deben estar de mañá, e no centro de Boiro, onde faltan tres de 12.

"Hai que ter en conta que esta zona é de veraneo", relata Rodríguez, para incidir no aumento de poboación que sofre a comarca durante a tempada estival. Neste sentido, lembra que non só chegan turistas que poden ter unha urxencia puntual, senón que hai nestes meses moitas persoas que ocupan as súas segundas residencias e que poden empregar as consultas de Atención Primaria.

Neste contexto, a portavoz da plataforma desconfía de que a situación se poida solucionar a través de propostas da Xunta como a contratación de médicos que teñan segundas residencias no Barbanza, tal e como avanzou no Parlamento galego o conselleiro de Sanidade, Antonio Gómez Caamaño; ou do emprego do MIR para cubrir vacantes.

Concentración fronte ao ambulatorio de Aguiño, en Ribeira, pola falta de médicos | Fonte: PLATAFORMA EN DEFENSA DA SANIDADE DO BARBANZA