Pontón defende que as europeas mostran un BNG "sen teito" pero chama a "non caer no conformismo"
Pontón que ese "ascenso imparable" pon "dos nervios" e "rabioso" ao PP.
Por Europa Press / Redacción | Santiago de Compostela | 15/06/2024 | Actualizada ás 16:19
A portavoz nacional do BNG, Ana Pontón, reivindicou que o resultado das eleccións europeas celebradas o domingo 9 de xuño evidencian que a formación frontista atravesa o "mellor momento da súa historia" e envía a mensaxe de que o seu crecemento "non ten teito", aínda que apelou aos cargos e a militancia a "non caer na rutina, o conformismo e a autocompracencia".
O Bloque reuniu este sábado nun hotel de Teo ao seu Consello Nacional para analizar o contexto político que queda tras as eleccións europeas nas que a coalición Agora Repúblicas, que os nacionalistas galegos compartían con ERC e EH Bildu, logrou tres escanos, o último para a frontista Ana Miranda, quen, no entanto, deberá ceder o seu posto transcorrido o ecuador da eurolegislatura a Tomás Molina, de ERC.
Ante a cúpula da organización, Pontón presumiu do apoio solicitado pola candidatura nacionalista o domingo, que supón "o mellor resultado nunhas europeas desde hai 20 anos" e dálle "por primeira vez desde 1999" un escano "na noite electoral". Uns resultados que, para a líder frontista, dan continuidade ao resultado das galegas e mostran que "o ascenso do BNG é imparable". "En contra de todos os agoreiros interesados, as urnas volveron a dicir que o BNG non ten teito", aseverou Pontón, que cre que ese "ascenso imparable" pon "dos nervios" e "rabioso" ao PP porque o escano en Bruxelas de Ana Miranda dará "unha voz propia" aos galegos para "defender" os seus "intereses". "Porque desde o minuto cero imos estar en Bruxelas dicindo 'si' á industrialización pero non á desfeita de Altri", apostilou.
En todo caso, Pontón aproveitou a reunión do Consello Nacional deste sábado para enviar unha mensaxe á organización e as bases, aos que alerta do "tremendo erro" que suporía nestes momentos caer no "conformismo", a "rutina" e a "autocompracencia". A líder nacionalista incidiu en que "os cambios transformadores necesitan tempo" e ve ao BNG en "boa dirección" cunha traxectoria na que, no últimos oito anos, foi capaz de "trazar un novo rumbo" que os levou a ser "a única forza política" que constitúe unha "alternativa real" ao Partido Popular.
