A patronal pontevedresa pide tolerancia cero "cos escraches na negociación colectiva"

A comisión permanente da Confederación de Empresarios de Pontevedra (CEP) pediu ás súas organizacións que "sexan intolerantes cos escraches na negociación colectiva" e volveu a reafirmarse na vixencia do protocolo contra estas mobilizacións e contra "calquera forma de presión que se adopte polas organizacións sindicais contra os negociadores dos convenios colectivos".

A patronal pontevedresa lembrou que este protocolo foi subscrito polas principais asociacións e federacións empresariais hai dous anos e advertiu de que "non se pode aceptar calquera forma de presión sobre as persoas que desinteresadamente participan nas distintas mesas".

Por iso, pediu que non se toleren esas actitudes "que lembran ao pasado e que atentan gravemente contra a liberdade que debe presidir calquera negociación nun marco democrático".

Nese sentido, a organización recoñeceu que "cada vez custa máis empresarios dispostos a participar na negociación colectiva, precisamente polas presións que a nivel persoal sofren, en moitas ocasións con danos directos ás súas empresas". Así, puxo como exemplo a negociación do convenio de Oficinas e Despachos, que asumiu directamente a CEP e que está paralizada "precisamente polos escraches e actos de presión sufridos pola propia Confederación e polas persoas presentes na mesa".

A CEP defendeu as súas formulacións nesa negociación e sinala que non cambiaron as circunstancias que levaron á suspensión das negociacións. Así, esixe para retomalas, "garantías de que non se van a repetir feitos de presión similares e de que poida haber avances na aproximación das posicións".

O órgano de goberno da CEP considera que a oferta empresarial "xa foi moi xenerosa e mellorala poría en grave risco a supervivencia de moitas pequenas e medianas empresas do sector".

Jorge Cebreiros, presidente da Confederación de Empresarios de Pontevedra (CEP).