Falece José Manuel Martínez-Lage, pioneiro no estudo da neuroloxía no Estado
Natural de Betanzos dedicou a súa carreira ao estudo e tratamento da epilepsia, o párkinson e o alzhéimer.
Por Galicia Confidencial | Compostela | 25/06/2024 | Actualizada ás 12:17
O doutor José Manuel Martínez-Lage, pioneiro da Neuroloxía en España e director durante case trinta anos do Departamento de Neuroloxía da Clínica Universidade de Navarra, faleceu este luns, 24 de xuño, en Pamplona aos 88 anos.
Natural de Betanzos, licenciouse en Medicina na Universidade de Santiago e doctorouse na Universidade de Navarra, a cuxa Clínica se incorporou ao concluír os seus estudos. Foi parte do equipo de especialistas que en 1967 puxo en marcha o Departamento de Neuroloxía, especialidade para a que se formou tamén no Hospital da Pitié-Salpêtrière de París e no King's College de Londres.
Como neurólogo, dirixiu a súa atención ao longo dos anos á epilepsia, e as enfermidades de Parkinson e Alzheimer. Ademais da súa tarefa asistencial, investigadora e docente na Clínica e na Universidade de Navarra, tivo cargos de responsabilidade nas ligas española e internacional contra a epilepsia e foi director da rede internacional que buscaba estandarizar os procedementos para a avaliación e diagnóstico dos pacientes de Alzheimer.
O Dr. Martínez-Lage foi autor de preto de 800 publicacións científicas, formou a máis de cen residentes na súa especialidade, presidiu a Sociedade Española de Neuroloxía e foi vicepresidente da Federación Mundial de Neurología. Ademais, recibiu a Cruz da Orde Civil de Alfonso X o Sabio.
