O mural de José Conde Corbal que adornaba o friso do antigo bar Carabela poderase desfrutar no Museo de Pontevedra

A Deputación de Pontevedra pechou a compra do mural de José Conde Corbal, que ata o 2022 adornou o friso superior do antigo Carabela, por valor de 6.000 euros á familia Alvariño. O mural, integrado por seis paneis datados en 1965, é unha peza de relevancia histórica, cultural e social para Pontevedra, cun significado identitario para a cidade que o fai merecedor de ser custodiado no Museo de Pontevedra.

Segundo detallou a Deputación, o Museo debe limpar e restaurar o mural xa que, aínda que se atopa en bo estado de conservación, debido á exposición ao fume e a outros axentes propios dun local hostaleiro, presenta unha capa de sucidade que deben eliminar para poder ser exposto nun estado óptimo. Desta forma, está previsto que unha vez posto a punto busquen a mellor localización dentro do Museo de cara á súa conservación e exposición.

Interior do bar Carabela | Fonte: Commons