Declarado culpable de asasinato o acusado de matar a unha veciña de 72 anos en Tirán
Por Europa Press / Redacción | PONTEVEDRA | 04/07/2024 | Actualizada ás 22:32
O tribunal de xurado conformado na sección segunda da Audiencia Provincial de Pontevedra declarou culpable dun delito de asasinato e dun intento de roubo a Balbino S.E., procesado pola morte da súa veciña Cándida S.P., de 72 anos de idade, en Tirán (Moaña), en xullo de 2021.
No seu veredicto, o xurado considerou probado por unanimidade que o 3 de xullo de 2021 pola mañá Balbino entrou na casa da vítima con intención de roubarlle. Por maioría de 8 votos, estimou que, para conseguir o seu propósito, agrediuna de forma "sorpresiva", causándolle diversas lesións e, aínda que ela tratou de zafarse e refuxiarse no baño, o acusado derrubou a porta dunha patada.
Así mesmo, o xurado viu probado que a maniatou e púxolle unha corda ao pescozo, causándolle a morte por asfixia, sen que a muller tivese posibilidade de defenderse. Todo iso en base aos informes periciais da Garda Civil que constataron o achado de sangue da vítima nas zapatillas do acusado, así como nunhas luvas localizadas na súa casa. Igualmente, lembraron que os investigadores localizaron as chaves de casa da vítima no domicilio de Balbino.
Por outra banda, considerou non probado que o acusado, consumidor de drogas cunha "dependencia moderada", tivese afectadas as súas capacidades volitiva e intelectiva no momento dos feitos. Igualmente, o tribunal popular tampouco viu probada a especial vulnerabilidade da vítima (argumento no que se baseaba a acusación particular para pedir prisión permanente revisable).
O xurado manifestouse contrario á suspensión da pena ou á aplicación do indulto total ou parcial. Á vista do veredicto, a Fiscalía mantivo a súa petición de 25 anos de prisión, e de 30.000 euros de indemnización para o único fillo de Cándida. Así mesmo, pediu que se lle prorrogue a prisión provisional ante o "risco de fuga".
