Besteiro critica a "falta de impulso" dos primeiros 100 días de Goberno de Rueda, que tacha de "conformista"
Tamén lle reprochou que culpe ao Goberno do Estado "de todos os males que ten Galicia".
Por Europa Press / Redacción | SANTIAGO DE COMPOSTELA | 08/07/2024 | Actualizada ás 15:11
O portavoz do Grupo Parlamentario Socialista e secretario xeral do PSdeG, José Ramón Gómez Besteiro, criticou a "falta de impulso" do Goberno de Alfonso Rueda nos primeiros 100 días desta lexislatura á fronte da Xunta. "Podería utilizar a expresión de vago, pero é máis adecuado un goberno falto de impulso e tinguiduras de indolencia", expuxo o líder dos socialistas galegos nunha rolda de prensa este luns no Parlamento.
En opinión de Besteiro, Rueda "segue sen trasladar que idea ten de país". Ademais, asegurou que nalgunhas áreas do seu Executivo ve "actitudes irrespetuosas", sinalando que o conselleiro de Sanidade "anunciaba entre risas que pecharía centros de saúde". Tamén reprochou ao Goberno autonómico que culpe ao Goberno do Estado "de todos os males que ten Galicia". "Esa falta de asumir as competencias é o que se demostrou nestes 100 días do Goberno de Rueda", resumiu.
XESTIÓN "INEFICAZ"
Do mesmo xeito, criticou a "ineficaz xestión dos servizos públicos", pondo como exemplo Sogama ou a xestión de Política Social, entre outros. Nesta liña, tamén expuxo que Galicia "segue crecendo menos que o resto de España" e "perde oportunidades".
"Estes 100 días confírmannos que as cousas seguen igual, cos mesmos déficits que tiñan na anterior lexislatura. Por tanto, a acción do PSOE sigue centrándose no emprego, no control sobre os dereitos públicos dos cidadáns e sobre a presenza en Europa e España máis activa de Galicia do que está a ser; superar esa fase onde parece que temos un presidente que non traballa ou que é incapaz, ou ben as dúas cousas", afirmou.
EUROPA
Xunto a Besteiro compareceu este luns o eurodeputado socialista Nicolás González Casares, que tras celebrar que a "socialdemocracia" foi capaz de "parar á ultradereita" en Francia, avanzou que reclamará un Comisario de Pesca en Europa.
"Imos traballar para que iso sexa de verdade importante", manifestou antes de engadir que ten o encargo do propio secretario xeral de porse "a disposición, como representante galego, do presidente da Xunta naqueles asuntos importantes para Galicia", xa que, opinou, o PPdeG "non ten presenza" en Europa.
"Sabemos que eles van ter menos influencia da que imos ter os socialistas. Cremos que somos unha ferramenta importante para o país", aseverou.
