Nacen menos persoas das que morren en Galicia; case un 2% menos que hai un ano
O 43,8% das nais galegas en maio tiña 35 ou máis anos.
Por Europa Press / Redacción | Santiago de Compostela | 17/07/2024 | Actualizada ás 11:31
Galicia rexistrou 1.156 nacementos no mes de abril, o que supón un 0,7% máis que os contabilizados no mesmo mes de 2023, segundo datos publicados este mércores polo Instituto Nacional de Estatística (INE), recollidos por Europa Press.
Desta maneira, no que vai de ano naceron en Galicia ata 5.500 bebés, un 1,82% menos que no mesmo período do exercicio anterior. Este descenso no primeiros cinco meses de 2024 contrasta co aumento rexistrado a nivel nacional, xa que no total de España contabilizáronse ata 130.461 nacementos, un 0,91% máis que entre xaneiro e maio de 2023.
Por idades das nais, no mes de maio, a maioría tiña entre 30 e 34 anos, con 413 bebés, mentres que 341 mulleres tiveron o seu fillo con entre 35 e 39 anos. Entre 40 e 44 anos foron nai 152 persoas e 60 con entre 20 e 24. En maio, 18 mulleres tiveron un bebé con entre 15 e 19 anos en Galicia e outras 12 fixérono con entre 45 e 49 anos. Ademais 2 tiñan 50 ou máis.
DEFUNCIÓNS
Por outra banda, en Galicia faleceron ata finais de xuño 17.278 persoas, un 2,11% máis que no mesmo período de 2023. A nivel nacional, este aumento quedou no 0,83%, con 226.994 falecidos ata a semana 26 do exercicio actual.
