Buscan a un home de 98 anos e enfermo de Alzheimer desaparecido da súa casa en Rairiz de Veiga

Un operativo trata de localizar desde última hora deste venres a un ancián de 98 anos, enfermo de Alzheimer, que falta da súa casa no municipio ourensán de Rairiz de Veiga. O equipo de dróns de Axega colabora cos equipos de emerxencia na súa procura. 

Foi a familia do desaparecido a que deu a voz de alarma, despois de que se marchase da súa casa, situada na parroquia e lugar de Sabariz, ao redor das 19:00 horas. O concello de Rairiz de Veiga difundiu o aviso nas súas redes sociais e a Garda Civil confirmou que está en marcha un operativo para tratar de localizalo.