Atrasos na estrea dos trens 'low cost' Avlo de Galicia Madrid
Houbo xa incidencias técnicas con atrasos de 15 minutos.
Por Europa Press / Redacción | A Coruña | 22/07/2024 | Actualizada ás 09:43
Renfe estreou este luns en Galicia os trens Avlo, a súa marca 'low cost', tras vender as máis de 500 prazas do convoi, que saíu de Vigo minutos antes das 06.00 horas. Tras a chegada dos Avril o pasado mes de maio, o que permitiu o desembarco do AVE en Galicia, este luns Renfe comezou a rodar con Avlo polas vías galegas, o que reduce o prezo da alta velocidade.
Na súa viaxe inaugural, unha pequena incidencia técnica provocou un susto aos usuarios, quedando parado 14 minutos en Santiago. A compañía iniciou a venda de billetes para estes trens o pasado día 5, acompañados dunha campaña de 'Superprezos' desde 7 euros para viaxar ata o 30 de setembro.
Estes servizos prestaranse cos novos trens S106 de Renfe de rodaxe desplazable (adáptase ás distintas vías e pode circular por elas a 300 quilómetros por hora) e con 581 prazas, segundo informou a compañía nunha nota de prensa.
Así, á oferta comercial actual entre Galicia e Madrid súmanse a partir deste luns dous servizos Avlo diarios, un por sentido, que alternarán as súas orixes/destinos entre Vigo-Madrid e A Coruña-Madrid, con paso por Santiago de Compostela. Estes trens realizarán parada en todas as estacións da liña: Segovia, Medina del Campo, Zamora, Sanabria AV, A Gudiña, Ourense, Vilagarcía de Arousa e Pontevedra.
En sentido Madrid-Galicia, haberá un Avlo con saída ás 17.08 horas con destino A Coruña os luns, mércores, venres e sábados, con chegada ás 21.04 horas. Con destino Vigo Urzaiz, haberá os martes, xoves e domingos, con chegada ás 21.37 horas. No sentido Galicia-Madrid, o Avlo con orixe A Coruña sairá ás 6.34 horas os martes, xoves, sábados e domingos, e con orixe Vigo os luns, mércores e venres ás 5.57 horas, con saída desde Santiago ás 7.06 horas e chegada a destino ás 10.32 horas.
O resto da oferta comercial entre Galicia e Madrid mantén as súas frecuencias actuais, aínda que con algunha modificación horaria en tres trens (Madrid 18.25-Ferrol 0.04, A Coruña 19.30-Madrid 23.03 e Madrid 20.23-Ourense 22.37). A estrea do Avlo este verán chega con trens S106 con maior capacidade, 581 prazas repartidas en 12 coches en filas de 3+2 e, segundo a compañía, suporá un incremento de máis de 8.000 prazas semanais na oferta do corredor Galicia-Madrid.
